New Delhi, Iaiong 08: Kum shi bynta ban pynneh ka jingiaid beit iaid ryntih ka jingpynpoi ia ki mar ba kongsan ha ka ri, 
U Home Secretary jong ka Sorkar Pdeng, Ajay Kumar Bhalla u la bthah lyngba ka shithi sha baroh ki Chief Secretary jong ka Jylla ban shim ia ki sienjam ba mar mar ban pynthikna ka jingdon ki mar ba kongsan.
Ki sorkar jylla ki dei ban ban pyntreikam ia ki kyndon jong ka Essential Commodities (EC) Act 1955. Kine ki sienjam ki kynthup ka jingbun kyndon halor ka jinglum mar, ka jingbuh dor ia ki mar, ka jingkyntiew ia jingpynmih mar, ka jingjurip ia ki account bad kiwei kiwei kiba kum kine ki sienjam.
Ka la don ka jingtip halor ka jing duna ha ka jingpynmih mar namar ki jingeh bapher bapher, khamtam ka jing duna ha ka jingpynbiang ia ki nongbylla. Ha kane ka jinglong jingman, ka don ka jingset ia ki mar bad ka jingdie beain.
Ka jingshim kabu ia ka jinglong ka khaii pateng, kaba pynlong ka jingkiew dor jong ki mar ba kongsan. La bthah ia ki Jylla ban shim ia ki sienjam ba mar mar ban pynthikna ka jingdon kine ki mar ba kongsan ha ki dukam sam reshon na ka bynta ki paidbah baroh.
Ha shuwa kane, ka tnad ki kam pohiing jong ka Sorkar Pdeng, lyngba ka hukum jong ka hapoh ka Disaster Management Act, ka la ai jingmynjur ia ka jingshna/ jingpynmih, jingpynkit bad kiwei kiwei ki kam ba iadei bad ka jingpynpoi ia ki mar ba kongsan kum ki mar bam, ki dawai bad ki tiar ai jingsumar.
Shuh shuh, ka Tnad Consumer Affairs, Food bad Public Distribution, Sorkar India, ka la ai bor ia ki Jylla bad ki Union Territory ban pyntip ia ki hukum hapoh ka EC Act, 1955 da kaba pynjynsur ia ka jingdonkam katkum ka jingmynjur jong ka Sorkar Pdeng haduh ka 30 tarik Jylliew, 2020.
Kiba leh pyrshah ne leh bakla hapoh ka EC Act kalong ka kam beain bad ki lah ban shah set phatok 7 snem lane shah dain kuna lane shah pynngat baroh ar kine ki jingpynshitom. Ki Sorkar Jylla bad Union Territory ki lah ruh kem ia kiba leh kam beain hapoh ka kyndon Prevention of Black-marketing and Maintenance of Supplies of Essential Commodities Act, 1980.
