Shillong, Naitung 14: U Dr DD Lapang Myntri Rangbah barim ka Jylla bad President ka MPCC, uba long ruh u MLA ka thain ula buh ia u Maw Nongrim ba T.4 lak na bynta ban shna ia ka madan ialehkai ha shnong Pahambir, Raid Nonglyngdoh, Ri Bhoi District ha kane ka taiew ba la dep.
Ha katei ka sngi ban plie ia u maw nongrim la donlang u Bah G Kharmawphlang, Egineer ka State Sports Council Meghalaya, u Bah KL Nongbri (EAC) Ri Bhoi District, Bah PM Marbaniang DSO Ri Bhoi, Bah CL Masharing, President Ri Bhoi District Sports Association, Bah D Ryntathiang, Secretary RBDSA, Bah Min Makri President Pahambir Sports Club, Engineer PHE bad PWD Nongpoh, Division bad kiwei kiwe ki riew rangbah ka thain.
Haba kren kum u Kongsan u Bah Lapang ula ong, “Ia kane ka skhim la pynkhreh naduh ka por ba nga dang long kum u CM bad da ka jingshim khia ka tnad ialehkai la ioh ban plie ia u Maw Nongrim mynta ka sngi.
“Watla ka jingialang long kaba rit, ka jingthmu pat kaba khraw” na bynta ban kyntiew ia ki khynnah samla ha ka jingialehkai sports, ula ong bad nga kyrmen ba na kane ka madan kan sei ia ki khlur ialehkai ki ban mih khmat ia ka district sha ka state lavel bad ia ka jylla hi baroh kawei.
Ula kyntu ia ki kontractor ba kin pyndep kloi ia ka jingtrei ha ka por kaba biang bad kumjuh ka tnad sports kan shimkhia ha ka ban pyndep kloi.
Shuh shuh ula kyntu ruh ia ki paidbah ban kin sumar bha ia katei ka madan hadien ba ka tnad sports ka la dep ban shna khnang ba kan long shisha kaba ai jingmyntoi ia ki khynnah samla ka thain bad ka Ri Bhoi District hi baroh kawei.(SP News)
