Shillong, Rymphang 25: Ka jingialap ilekshon MDC ha ki ar tylli ki District Council, KHADC bad ka JHADC kala kut mynta ka sngi ha ka por saw baje noh phai sngi ha kaba bun ki kyrtong kila pynkut da ka jingiaid paidbah ban pyniala ka jingdon ki nongkyrshan jong ki seng bad ki kyrtong shimet.
Ha kine ki sngi ba la don ka jingialap ilekshon kila don ka jingiakynnoh na kawei ka party pyrshah ia kawei ka party ha ki ba bun ki rynsan kanbas ilekshon. Wat kila don ki jingiakynnoh ba la don ka jingiashoh ia dat hapdeng ki nongkyrshah hapoh Mawsynram konstitwensi hynrei ha baroh hi ka jingialap ilkeshon MDC kala iaid beit.
Ki briew jong ka sorkar ki ban pyniaid ia kane ka MDC ilekshon ha ki ar tylli ki District Council kiba bun kin mih la shai ka sngi ba kin poi sha ki jaka ba la buh ban don ka jingiathep bot ka ban long ha ka 27 tarik mynta u bnai.
