Shillong , Iaiong , 12 : Ka election sha iing dorbar thaw ain jong ka jylla kan sa long hapoh kine ki shiphew bnai bad ki kyrtong kiba don jingthmu ban ia aireng ki phai khmat sha ka National People Party ( NPP) hapoh ka jingialam jong u Conrad K Sangma uba dei ruh u MP jong ka 2-Tura parliamentary constituency .
Ka daw jong ka jingkwah ban iakhun ia ka election na kane ka seng , ka long ba ki briew ki la iohi ia ka jinglah ka jong u ban ia kren ia ka khia ka shon ki paidbah ha kane ka jylla hapoh ka dorbar bah jong ka ri india , Parliament .
Ki thymmei khubor kiba ia jan bad ka NPP ki iathuh ba najan baroh ki constituency ha ka jylla kila don shibun , ka jingiapan ticket na ka seng . Hynrei la ong ba ka seng ka hap ban bishar bniah ia ki kyrtong shuwa ba kan ai ia kano kano ka rai .
Ka jingmih pyrthei jong ka seng People Democratic Front (PDF) hapoh ka jingialam jong u bah Ivanlumlang Marbaniang kala dang pharia ia ki seng riewlum ha kane ka jylla , kum ka UDP , KHNAM , MDP bad kane ka pynlong ba bun na ki kyrtong ki kham phai khmat sha katei ka seng NPP ha kaba u nongialam jong ka seng ula pyni ia ka mynsiem u nongialam da ka jingiashim bynta jong u hapoh parliament .
