Jowai, iaiong 01: Ki san tylli ki sengbhalang na ri lum Jaintia ki ba kynthup ia ka SRS-EJH , AJYWO-Sengkmie, KSU-JHDU HNYF-EJZ, bad FKJGP-KC, ki ba la ieng pyrshah la baroh shi katta ia ka sorkar halor ka jingleh mynthi jong ka ia ka mat jingdawa jong ki ban maramot noh wut wut ia ka Surok NH 44 naduh Soomer, West Jaintia Hills haduh Malidor, East Jaintia Hills, ha ka jingiakynduh lang jong ki ha kane ka sngi Saitjai ba la dep ha ka nongbah Khliehriat, ki la shim syndon da ka rai ban pynlong syndon da ka jingialang paidbah ha kompon jong ka community Hall jong ka Khliehriat West ha ka 5 tarik mynta u bnai ha ka por 11 baje mynstep shaneng ban pynsngew sha u paidbah halor kane ka jingle mynthi jong ka NHAI bad ka sorkar Meghalaya bad ruh ban shim syndon da ka rai kaba tyngeh ha ryngkat u paidbah pyrshah ia kaneka jingleh jong ka sorkar.
“Ngi la isynei palat ia ki ba pli ki paidbah bad ki kali jong ki haba ki iaid lynti lyngba jong ka NH44. Hoid ngi la pyrshang da kiba bun ki lad ban pynbor ia ka sorkar ban maramot ia kane ka surok kaba dei u thied snam jong ki paidbah ym tang jong ki nong Jaintia hynrei jong ka thain Northeast India hi baroh kawei hynrei ka sorkar kam shym la patiaw ia ki jingdawa jong ngi. Kumta ka por ka la dei mynta ban ailad syndon ia u paidbah ban shim noh ia ka rai kaei kaba ngin leh nangne sha khmat ban pynpei shkor bad pynpeit mat ia ka sorkar.” ong u Bah M H Dkhar President jong ka AJYWO-Sengkmie.
“Ngim lah ban len, ba ym tang ka sorkar Meghalaya kaba leh kmie-nah ia ka Jaintia Hills hynrei wat ka sorkar pdeng (India) ruh. Ka NH 44 kadei ka surok bah jong ka Ri India (National Highway) kaba sniew tam ha kine ki por. Ngim tip na kaei ka daw ba ka sorkar ka iehbein ia kane ka surok haduh katne katne. Hynrei wat la katta ruh, ka sorkar kan sa sngewthuh hadien ka 5 tarik mynta u bnai.” bynrap shuh shuh u Bah M H Dkhar.
Ki san seng ki kyrpad ruh ia ki paidbah naduh ki samla shynrang kynthei haduh ki long kmie long kpa bad khamtam eh ki nongialam shnong ba pher bapher jong ka East Jaintia Hills District ba ki dei ban shim khia ia kane da kaba kin sngewbha ban ia wan khnang khnang sha katei ka jingialang paidbah khnang ba kin ioh sngew da la ki jong ki shkor halor ka jingshah ieh bein jong ka NH 44 ha ka sorkar bad ruh khnang ba da ka wei ka sur, ka jingmut bad ka bor ngin lah ban shim lang ia ki rai jingiakhih kiba tyngeh pyrshah ia kane ka jinglong kyllut bad matlah jong ka sorkar ha ka jingiadei bad kane ka surok lym kumta ka apot sepngi shen kan sa wan lynshop ia ngi iwei pa iwei.(SP News)
