Shillong, Iaiong, 12 : Ki nonghikai skul hapoh ka lama jong ka JACATAM mynta ka sngi kila pynlong ia ka jingiakhih ha jan ka ophis jong ka All India Radio ban shah thngan ban pynpaw pyrshah sha ka sorkar ia ka jingleh bymsuid niew jong ka sorkar ban pynkiew ia ka tulop jong ki nonghikai skul kumba la klumar hapoh ka iing dorbar . Na ka liang jong ka seng kala ong ba lada ka sorkar kam leh ei ei ha kane ka taiew ban wan kim ban se ban shim da ki lad ki lynti kiba tyngeh.
U bah K Khongjirem uwei na ki nongkitkam jong ka seng ula ong ba kane ka jingiakhih ka jong ki ka long kaba jai jai katkum ki kyndon ka riti synshar jong ka ri ban dawa ia ka hok jong ki , hynrei kumba ka paw ka sorkar kam shim la burom ia kane ka jingiakhih ba jai jai jong ki nonghikai bad lada ka long ha kane ka rukom kan long kum ka jingpynbor ia ki ba ki hap ban khang pynjur ia ki lad ki lynti jingiakhih .
Na ka liang ka seng kan peit aiu ka sorkar kan leh halor ka jingdawa ha kaba iadei bad ka jingpynkiew ia ka tulop , lada ia kiwei ki nonghikai adhok la lah ban pynkiew balei ia kiwei pat ki sorkar kam lah ban pynkiew kumba la kren da u Myntri Rangbah ka Jylla hapoh ka iing dorbar . Ki nonghikai kim don jingiapher namar ba ki hikai ia ki juh ki khynnah ha ka juh ka klas kane ka jingleh ka sorkar ka long kumba wanrah ia ka jingiapher jingmut bad ban phiah ia ki nonghikai la ong u Bah Khongjirem .
Lada ka long ha kane ka rukom ki nonghikai kim banse ban shim ia ka rai kaba kham tyngeh ha ka taiew ban wan la ka long ha kano kano ka rukom ban pynbor ia ka sorkar ba ka dei ban pynurlong noh ia ka jingdawa kaba la dep ban buh hakhmat jong ka sorkar na ka por sha ka por . Ki nonghikai kiba la ia poi ban iashim bynta ha kane ka jingiakhih kaba mynta ka sngi ka long na kylleng jong ka jylla .
