Shillong, Naiwieng 21: U MLA ba mynta jong ka seng Congress na Pynthorumkhrah u Bah AL Hek u ba dei ruh u myntri ba rim jong ka tnad ka koit ka khiah, mynta ka sngi u la ai da ka FIR ha u Superintendent jong ki pulit jong ka East KHasi Hills District, ba kala don ka hamsaia ba kala don ka jingsam pisa sha ki briew ha ka kyrteng jong u.
Ha kane ka FIR kaba la ai mynta ka sngi ha u SP jong ka East Khasi Hills District u Bah Hel u la ong “ Nga wan ban pyntip sha phi, ba kala don ka jingpynher ia ka hamsaia da ki briew kiba ymlah ban tip, ba nga sam pisa T.5000/- tyngka man la u briew, ym tang ia ki briew hapoh ka konstitwesni ka jong nga hynrei wat sha bar jong ka konstitwensi ruh kum juh”
Ha kane ka FIR, u Bah Hel u la ong shuh shuh ba namar kane ka hamsaia, “ kala pynlong ba da ki spah ngut ki briew man ka sngi kin wan sha iing jong nga na kylleng bad kumjuh ha poh ophis naduh dang step haduh por miet, kane kala pynthud ia nga bad kala wanrah ia ka jingsngewthuh bakla hapdeng bun bah ki briew”.
Na ka liang jong u Bah Hek u la ong ba kane ka long kaba bakla bad kam don ei ei kaba kumta, na ka liang jong u myntri u la kyntu ia u heh jong ki pulit ban phah tohkit mardor ia kane ka jingshah pynbudnam ia u bad ban leh ia kaba don kam ban lap ia kum kita ki briew kiba la pynher ia kane ka hamsaia kaba la pynbud nam ia ka kyrteng jong u.
Haba kren ha ki lad pathai khubor ha dien ba la dep ban ai ia kane ka FIR u bah Hek u la ong ba naduh ba ka mih kane ka hamsaia ki briew kiba la wan sha iing jong u na kylleng kan nym duna ia ka hynniew spah ngut ki briew. Ka jingai ia kane ka FIR ka long ban lap ia kito ki ba pynher ia kane ka hamsaia bad dei ban kem ia ki ban pynshitom katkum ka ain. La ong u Bah Hek.
