Shillong, Naitung 19: Ka kynhun Meghalaya State Olympic Association, (MSOA), hapoh ka jingialam jong u Shri Zenith M. Sangma, Hon’ble Minister of Sport and Youth Affairs, Govt of Meghalaya & President Meghalaya State Olympic Association, u Bah John F Kharshiing, Working President Meghalaya State Olympic Association, ki la leit ai ia ka jingtyrwa ban pynlong ia ka National Games 2022 hapoh ka jylla Meghalaya, ha u N Ramachandran, President Indian Olympic Association, bad u Rajiv Mehta, Secretary General Indian Olympic Association, ha ka 19tarik July 2016, ha Olympic Bhavan, New Delhi, ha ryngkat ki officer Sorkar Meghalaya bad ki nongkitkam ka Meghalaya State Olympic Association.
Ka shithi jingtyrwa na ka liang ka MSOA ka kynthup ia ka shithi kular na ka liang u Dr Mukul Sangma, Chief Minister, ka jylla Meghalaya ban kyrshan ia katei ka jingthmu, bad ka shithi kyrshan ia katei ka jingthmu Meghalaya National Games 2022, ha ryngkat ka “Bid Money” sanphew lak da ka cheque kum shi bynta jong ka jingsiew kaba long kum ka advance na ka san crore kaba dei ka bai allotment kaba ka Sorkar Jylla Meghalaya ka hap siew sha ka Indian Olympic Association, na ka bynta ka National Games 2022, kaba dei ruh ka jingdap 50 snem ka jylla Meghalaya.
La mih ruh ka jingkren na ki heh jong ka IOA ba kumba ka long mynta ka Manipur kaba la ioh ia ka National Games ha ki snem 1999 ka la wanrah ka jingmyntoi ia ki samla ha ki kam kyllan met namar ki ioh lyngba ka National Games ia ki infrastructure ki stadium outdoor bad indoor kiba biang kiba la ai lad mynta ban ai lad ia ki samla Manipur ba kin long ki nongialehkai kiba hakhmat duh ha kiba bun ki sport. Ka Assam ruh ka la ioh ia ka National Games ha ki snem 2007.
Ha katei ka jingiakynduh la don ka jingiakren kaba sani bha halor ka jingthmu jong ka Meghalaya State Olympic Association, ban kyrpad ia ka Indian Olympic Association,IOA, ba kin ai lad ia ka Meghalaya ban pynlong ia ka National Games. Ha katei ka jingialang hadien ka jingiakren kaba sani bha, u President bad Secretary General IOA, ki la mynjur ba ka jylla Meghalaya ka don hok ban ioh ia kane ka allotment ban pynlong ia ka National Games, bad kin sa rah ia kane ka agenda ha ka Annual General Meeting, AGM, kaban sa wan bad u la ong ba ki la kyrpad ia u Bah John F Kharshiing, ban kren ha ka AGM kaban sa long hadien ka Rio Olympic.
U President bad Secretary General. IOA, ki la kyntu ia ka u Minister, bad ka MSOA ban thaw lad ban leit sha Rio kum shibynta kum ki observer ban ioh jingmut kiba kordor halor ki rukom pyniaid ia ki jingialeh kai kiba bun paid bad kiba heh kum ka Olympic.
Ha katei ka jingialang la don lang u Bah F R Kharkongor IAS, Commissioner and Secretary,Sports And Youth Affairs, Govt of Meghalaya, u Bah F M Dopth, MCS, Director of Sports, Govt of Meghalaya, u Bah Ian Khongmen, Vice-President Meghalaya State Olympic Association, bad u Bah Chiranjib Choudhury, General Secretary Meghalaya State Olympic Association.
