Shillong, Kyllalyngkot 31: Ka Green Economy Meghalaya ka dei ka projek ban pynneh pynsah ïa ki khlaw ki btap, ba ka Council kan ai da ka jingïarap pisa ïa ki nongrep kiba ïada ïa ki khlaw.
Kum shibynta ban pynïaid shakhmat ïa ka projek “Green Economy Meghlaya” Ka Khasi Hills Autonomous District Council (KHADC ) ha ryngkat ka jingïatreilang bad ka Meghalaya Basin Development Authority (MBDA) ka sorkar jylla, mynta ka sngi ka la pynlong ia ka jingïalang ha State Convention Center.
Haba kren sha ki lad pathai khubor u Bah Pynïaid Sing Syiem u ba dei u CEM ka KHADC, u la ïathuh ba kane ka project kan long ka jingïatrei lang hapdeng ka KHADC, MBDA bad ka jingïasnohkti lang da ka Rabo Bank Acorn bad ka Iora Ecological Pvt Ltd kiba na ka nongbah Delhi ban pynurlong ïa kane ka jingthmu.
Ka jingïalang kaba la khot da ka KHADC ha ryngkat ka Meghalaya Basin Development Authority (MBDA) ban ia kren halor ka Projek “Green Ecomony Meghalaya” kaba long ka jingthmu ban pynneh pynsah ïa ki khlaw ki btap da kaba kan ai jingïarap sha ki nongrep kiba thung dieng, kynthup ïa ki dieng latyrpat, ki dieng sohmarit, ki dieng kwai bad kiwei kiwei.
U la ong ruh ba Ka council kan ai ruh ïa ka jingïarap sha ki khlaw kyntang, ki khlaw ka Hima, ki khlaw kur, halor kane ngi la dep ban pynlong ïa ka jingïalang bad mynta ka sngi ngi la khot jingïalang bad ka JHADC bad GHADC, kaba ki khlem wan, hynrei la wan shim bynta da ki nongïalam Hima.
U bah Pyniaid u laong ban ïada ïa ki khlaw ki btap ki don ki aiñ na ka sorkar pdeng bad ka sorkar jylla hynrei kane ka sienjam ka long ban ïarap ïa ki nongrep kiba ïarap ban pynneh pynsah ïa ki khlaw da kaba ai da ka jingïarap pisa hapoh kane ka projek.
U Bah Pyniaid u la ïathuh ba haduh mynta la don haduh 28 ngut ki nongrep kiba la dep ban register ïa lade na ka bynta ka ne ka projek. Kine ki 28 ngut ki nongrep kiba la dep ban register ha KHADC na ka bynta ban pynneh pynsah ïa ki khlaw kin long ki nuksa na ka bynta kiwei pat ki nongrep ba kin wan sha khmat ban shim ïa ka sienjam ban sumar sukher ïa ki khlaw ki btap.
