Shillong, Rymphang 09: Ka Khasi Autonomous District Council ha ryngkat ka jingiatrei lang bad ka Monolith Cordination committee mynta ka sngi ki la pyntip ba ka Tamasa Mawbynna ka ba mynta u snem 2024 ka ban sdang na duh ka 22 tarik Mynta u bnai ka ban kut pat ha ka 24 tarik mynta u bnai kan long kaba kham pher na ki tamasa ki ba la pynlong teng ha ki por ba mynshwa.
Ha ba kren sha ki lad pathai khubor na ka liang u Deputy CEM ka KHADC u bah P N Syiem u la ong ba ki iing jong baroh ki hima ki ba don ha kane ka heritage village la dep ban pynbha lut baroh bad ha kane ka kynti ba mynta na ka liang ka council ka la ioh ruh ban kham pyni tynnad ia kane ka Heritage Village ha kaba ki la ioh ban kham pynbha ia ka jaka buh sah kynmaw ia ki tiar ki khasi hyndai.
U bah PN Syiem u la ong ruh ba ha kane ka kynti ba mynta na ka liang ka KHADC ka la khot kyrpang ruh ia ki jaidbynriew na rilum Garo bad kumjuh ruh na rilum Jaintia ba kin ioh ban pyni nam ia ki tiar tynrai jong ki bad kumjuh ruh ia ka bam tynrai jongki. U la ong ruh ba hakane ka tamasa kan don ka jingpyni nam ka shad tynrai, ki jingleh kai tynrai , ka bam tynrai bad kiwei kiwei ki jingpynbyrngia.
U bah PN Syiem u la pyntip ruh ba ia kane ka Festival yn wan ban plie da u Deputy Chief Minister u bah Prestone Tynsong bad ha ka sngi pynkut yn wan da u Chief Minister U Conrad Sangma ha ryngkat ka jingiadon lang u Minister of Tourism u bah Paul Lyngdoh.
Na ka liang u Bah Alan West u ba dei u Dkhot jong ka Coordination ula ong ba kane ka festival hakane ka Kynti ba mynta kan long ka ba kham pher bad ban kham pynshong kun ia kane ka Tamasa yn wanrah pat ia kiwei ki Hima ki ba khlem pat don bynta haka Monolith Festival ha ki por barim.
U la ong ruh ba ka jingwan rah jong ka District Council ia kane ka tamasa ka long kum ka lad ba ngin ioh ban pyn I ia ka Tynrai jong ngi ki khasi. Ha kane ka sngi na ka liang ka Khasi Hills District Council ka la Ioh ruh ban pyllait ia ka jingrwai phang pdeng jong kane ka Monolith Festival 2024.
Kane ka kali kam leit kylleng kylleng ki shnong ki thaw ban pynbna paidbah sha ki paidbah ban wer sha kane ka Festival ka ban long naduh ka 22 tarik mynta u bnai March ka ban kut pat ha ka 24 tarik mynta u bnai March 2024.
