Shillong, Nailur 11: Ka iing dorbar thawain ka jylla mynta ka sngi kala kyntiat ia ka jingdawa bala wanrah da ka Dr Ampareen Lyngdoh ban pynrung ia ka jylla Meghalaya hapoh ka Artikle 371 jong ka ritki synshar jong ka Ri India da ka “Voice Vote”.
Ha dien ka jingiakren halor ka phang bala wanrah da ka Dr Ampareen Lyngdoh ban dawa ba dei ban pynrung ia ka jylla Meghalaya hapoh ka Artikle 371 ban ioh ia ka jingiada kaba kyrpang ha kaba la ia shim bynta na baroh arliang, ka liang pyrshah bad ka liang synshar bad ha dien bala ioh ia ka jubab na u myntri ba dei peit ia ka District Council u James K Sangma u Deputy Speaker ba pyniaid ia ka dor u la kwah ban tip la Dr Ampareen kan weng ne em ia kane ka jingdawa.
Na ka liang jong ka Dr Ampareen kala ong ba kan nym weng ia kane ka jingdawa jong ka bad ha dien ba kam shym la weng na ka liang jong u Deputy Speaker u la buh ha khmat jong ka iing dorbar ban don noh da ka “Voice Vote” ban shim ia rai bad ha kane ka jingiavote ka liang pyrshah la rem, kumta ia ka jingdawa la kyntait da ka iing dorbar.
Haba jubab ia ka jingiakren na ka liang jong u myntri ba dei peit ia ka tnad District Council u James K Sangma, u la ong ba baroh ia don tang kawei ka jingmut na ka bynta ban iada ia ka jylla, u la ong ba kila don bun ki ain ban iada ia ki briew jong ka jylla bad ia kane ka juh ka jingiakren la wanrah da u Bah Ardent Basaiawmoit ia kaba la kyntiat da ka sorkar ha kato ka por.
Haba ia dei bad ka jingkynnoh ba kala don ka jingktah ia ka jinglong ia ka “Federal Structure” jong ka Ri kane kam dei kaba thymmai ia kane la juh ia kren mynta la bun bun snem, ban ong ba kam don ka jingiasngewthuh hadpeng ki jylla bad ka sorkar pdeng ka long ka bym shisha mynta leit ki myntri jong ka sorkar pdeng ki wan na ka por sha por ban sngewthuh ia kane ka thain.
U James K Sangma u la kren shai ba yn nym lah ban bujli da ka Artikle 371 ha ka jaka jong ki District Council. Haba ia dei bad ka jingkwah ban don ia ka Kommittee ban iakren ia kane ka bynta la ong ba kala don ka standing Committee hapoh Rajya Sabha.
Ban bynrapap ia ka jingjubab jong u myntri ba dei peit ia ka tnad District Council, U myntri rangbah ka jylla u Conrad K Sangma u la ong ba hapoh ka jylla ruh kala don ka Kommittee ban ia peit bniah ia kane ka kam.
Nalor ka Dr Ampareen Lyngdoh kaba wanrah ia ka jingphang jingiakren ban dawa na ka sorkar ban prung ia ka jylla hapoh ka Artikle 371, kiba la kyrshan ia ka ki long u bah George B Lyngdoh, Bah Process T Sawkmie, Zenith Sangma bad u Dr Mukul Sangma.
Na ka liang synshar ba pyrshah ia kane ka mat jingiakren u dei u bah Reniktone Tongkhar,ha ka jingkren jong u u la ong ba u pyrshah ia kane ka mat jingiakren, hynrei kaei kaba sngewtynnad ka long ba ia ka jingud jingnam jong ki kpa tynmen jong ki seng riewlum mynta kala rung ha ka jingpyrkhat jong ki national party.
