Shillong, Jymmang 22: Ryngkat bad ka pyrthei shityllup ka jylla Meghalaya ruh mynta ka sngi kala rahe ia ka sngi pynneh pynsah ia ki jingthung jingtep bad ka phang pdeng jong ka jingrakhe ia kane ka sngi mynta u snem ka long “ Ki jingthung jingtip bad ka jingpynneh pynsah ia ki kam jngohkai pyrthei”. Ia kane ka jingrakhe la pynlong ha Soso Tham Auditorium.
U Additional Chief Secretary jong ka jylla u ba dei peit ia ka tnad khlaw u u ba dei ruh u chairman jong ka Meghalaya Biodiversity Board (MBB) u Dr. Shreeranjan u la ong ba ka jingpynlong ia kane ka jingrakhe ka long ban pynsngewthuh sha ki samla pule ia ka jingdon ki jingthung jingtep kiba bun jaid ha kane kajylla bad ban ialeh kumno ban sumar ia ki.
Ha ka jingkren jong u Dr. Shreeranjan, u la ban jur ia kawei ka phang bad kata ka long kumno ban ialeh pynneh pynsah ia ki jingthung jingtep ha kane ka mei mariang, u la ong ba dei ban hikai ia ki khynnah ban ialeh kumno ban burom ia ka mariang kum ki briew ki don ka bynta kaba khraw ban leh ia kane.
Na kaliang jong u Dr Shreeranjan u la pynshlur ia ki paidbah ban ia leh kumno ban lap ia ki jingthung kiba thymmai bad lada lap ia kip hah sha ka MBB ban buh ha ka jingthoh bad kane kan iarap ia ka jylla ban buh ha ka bui ia ka jingdon ki jait jingthung ha kane ka jylla. Ha kane ka sngi la pynlait paidbah ruh ia ka jingthoh ha kaba ia dei bad ki kyndon kiba ia dei bad ki Biodiversity Management Committees (BMCs) ha ka ktien Khasi bad Garo.
Ha kane ka sngi u Secretary jong ka MBB, u M. B. K. Reddy u la pynia ia ka jingtrei kam jong ka MBB bad ia ki kam kiba ka MBB kala leh ha kine ki snem. U myntri barim jong ka jylla u Bah JM Parait u ba dei peit ia ka tnad khlaw , u PCCF u CP Marak ruh kila ai jingkren ha kane ka sngi.
