Shillong, Jylliew 22: Ka wei na ki seng bhalang na Garo Hills ka Achick Youth Welfare Organization (AYWO) mynta ka sngi kala leit ban ai ia ka dorkhas sha u myntri rangbah ka jylla u Dr Mukul Sangma bad ha kane ka dorkhas jong ki ka mat jingdawa kaba nyngkong eh ka dei ka Jylla Garo state.
Ha kane ka dorkhas kane ka seng kala buh haduh khathynriew tylli ki mat jingdawa nalor ka jingdawa ban ioh ia ka jylla Garo State. Ka jingdawa kaba kham ha khmat nalor ka jylla ka seng ka dawa ba ia ka dorbar tlang jong ka iing dorbar thawain ka jylla dei ban pynlong ha Tura.
Ka seng kala dawa ruh ba ka sorkar ka dei ban pynlait noh ia ka bhah tyngka jong ka GHADC namar kumba ka long mynta kine ki nongtrei la jan shiphew bnai kim shym la ioh ia ka tulop jong ki na kadaw ba ka sorkar kam shym la pynlait ia ka pisa jong ka GHADC. Ka sorkar ka dei ban don ka jingsngew na ka bynta ki nongtrei ha katei ka ophis.
Ka seng kala buh ruh ia ka jingdawa ba dei ban pyntrei kam noh ia ka Beljek Airport kumba la kular da ka president ba rim jong ka Ri India ka Pratibha Patel, ha kaba ka la ong ba kane ka kad liengsuin ka dei ban trei kam noh.
Haba phai sha ka pule puthi, ka seng ka la dawa ba ia ka NEHU Tura compus kaba don mynta dei ban pynkylla noh sha ka University kaba pura, ka sorkar ka dei ban plie ia ki jingpule kum ka Commerce bad ka science ha ki college kiba don ha Garo Hills bad kiwei kiwei kiba ia dei bad kane ka juk ba mynta.
Namar ba u myntri rangbah ka jylla u Dr Mukul Sangma u la buh ia u Mawnongrim na ka bynta jong ka Government Medical College na ka liang jong ka seng ka kwah ban iohi ba ka sorkar ka dei ban pyntrei kam noh kloi ia kane bad ia ka Engineering college.
Ha kane ka dorkhas ka AYWO kala kren ruh ia ka dawa ruh na ka sorkar ba ka dei ban maramot noh ia ki surok kiba don ha Garo Hills kum ka surok na Tura sha Dalu kaba dei ka NH-51, Baghmara sha Ranikor , ka surok na Agia, Mendipathar, Phulbari Tura, Garobada Selsella, Rajabala ba ia kine ki surok dei ban pynbha noh.
Ka sorkar ka dei ban pyndep noh ia ka jaka pynmih bor ding eleltrik na ka Ganol hydel power project, ka dei ban shna ia ki jaka jongohkai pyrthei bad ka dei ban leh noh ia kine kham kloi lan, ia ki block kiba ka sorkar kala ong ban thaw thymmai bad ia ki Sub Division ka dei ban pynkloi noh na ka bynta ka jingmyntoi jong ki paidbah.
