Jowai, Naitung 25: Ka AJYWO ka pynpaw ia ka jingsngewdiaw haduh katta katta halor ka jingsniew palat jong ka National Highway 44 ha baroh shilynter khamtam ha ki bynta kiba hap naduh Khliehriat haduh Kongong ha kaba ki paidbah myn ha kane ka Behdeinkhlam jong ka Sein Raij Tuber kaba dang shu dep shen, ki la pyndonkam lyngba u surok u ba sniew bad u ba khohruh khohram ha ka ban rakhe ia kane ka jinglehniam Behdeinkhlam.
“Ngi dang khmih lynti ba ka sorkar kan maramot biang ia kane surok NH 44 kaba la dap satang ki thliew ki krem bad ki pung um naduh Khliehriat haduh Kongong na ka bynta ka jingrakhe ia ka Behdeinkhlam kaba heh tam ha Jaintia Hills hynrei pleng ka jingkhmih lynti jong ka seng bad ka jong u paidbah kam shym la urlong haba ka sorkar lyngba ka tnad PWD Central Division, Jowai ka la maramot tang ia ki bynta kiba u Chief Minister jong ka jylla u Dr. Mukul Sangma u la dei iaid lynti ha ka por ba u la wan ban sakhi ia ka Behdeinkhlam jong ka Sein Raij Tuber kaba dang shu dep shen katba kiwei pat ki bynta ki ba u Chief Minister um dei iaid lynti, ka sorkar lyngba ka tnad jong ka kaba dei peit ia kane ka surok ka la shu ieh lyndet kumto ia kane ka surok khlem maramot”, ong u Bah MH Dkhar President jong ka AJYWO Sengkmie.
U Bah M H Dkhar u la ong shuh shuh, “Kane ka jingleh jong ka sorkar lyngba ka tnad jong ka kaba dei peit ia kane ka surok ka dei ka jingleh arsap ha kaba ka pynbha tang ia ki bynta kiba ki khmat jong u Chief Minister un iohi bad iaid lynti lyngba katba ia kiwei pat ki bynta jong kane ka surok, wat la ki la sniew haduh katta katta ruh pynban ka tnad ba dei peit ia kane ka la shu ieh lyngkrang kumto ia kane ka surok. Kat haduh ba la iohi ia kane ka surok, kum ka surok khlem trai, khlem nongsharai bad khlem nong sumar kaba la ktah shi katdei eh ia ka leit ka wan jong ki paidbah”.
“Ka NH 44 khamtam na duh Khliehriat haduh Kongong kat kum ba ka long mynta ka don satang ki thliew ki krem la i ia ka la kum ka pung dohkha ha ka por ba hap u slap. Ki kali rit ba pli kim long shuh ban iaid. Ki paidbah kiba don kali rit mynta kim banse ban shu set op ia la ka jong ka kali ha iing namar bym long shuh ban iaid lynti lyngbah kane ka NH 44 namar lada tang shu iaid lyngba kanen ka surok, la ur beit ha ki thliew bad tyngkhuh beit ha ki maw bad sniew artad” la bynrap shuh shuh u Bah M H Dkhar.
“Ka jingsniew jong ka NH 44 ka la long naduh Shohshrieh haduh Malidor. Ka jingsniew bas ha palat u pud jong kane ka surok ha kiba bun ki bynta, ka la ktah bha ia ka leit ka wan jong ki paidbah kiba dei pyndonkam ia kane ka surok. Ka long ka jinglehrain ia ka sorkar India ban ai nam ia kane ka surok da ka National Highway katba ka jinglong jong ka kam ia ryngkat dor tang kum ka surok kulai ruh,” ong shuh shuh u Bah Dkhar.
“Ka AJYWO Sengkmie namar kata ka dawa na ka sorkar bad ka tnad kaba dei peit ia kane ka surok ba ka dei ban maramot noh wut wut ia ka na ka bynta ka bha ka miat jong u paidbah lym kumta, ka seng kam ban se ban shim da kawei pat ka lynti kaba tyngeh ha kine ki khyndiat sngi ban wan ban pynbor ia ka sorkar ban maramot ia kane ka surok”, pynkut u Bah M H Dkhar.(SP News)
