Shillong, Risaw 11: Ki n
ongialam jong ka Khasi Students’ Union (KSU) Barak Valley Circle, Assam lyngba jong u Dr Samujjal Bhattacharjee, nongai buid jong ka North East Students’ Organization (NESO), Assam, kila dawa na ka sorkar Assam ba kan ithuh ia ki khasi kiba don ha katei ka jylla kum ki riewlum ki bym hap hapoh jong ka autonomous districts councils kiba don hapoh ka jylla Assam baroh kawei. Ia kane ka jingthoh kila ai ha ka sngi ba ka seng ka rakhe ia ka jingdap 10 snem ha Assam ha kaba u Dr Samujjal u long u kongsan.
Na ka liang jong ka seng ka dawa ruh ba ka sorkar Assam ka dei ban ai jaka bad ban shna ia ka Hostel na ka bynta ki samla pule Khasi ha Silchar, kum ka seng ka dawa ruh ba ka sorkar ka dei ban pyntrei kam ia ka ain Forest Rights Act, 2005 da kaba ai patta ia bad ban ai ka jingithuh ia pud u sam jong ki riewlum hapoh jong ka Barak Valley, hapoh jogn ka sorkar Assam.
Ia kine ki mat jingdawa jong ka seng la ai sha u tei u nongai buid jong ka seng NESO ba un rah sha ka sorkar Assam ban pynsngew ia kane ka jingeh jong ki khasi kiba don ha poh ka jylla Assam. Na ka liang jong ka KSU Barak Valley ruh ka dawa ba ka sorkar Assam ka dei ban thaw ia ka Khasi Jaintia Development Council (KJDC) Assam, kaba ki Khasi kiba don ha Assam ki angnud.
Ha kane ka jingthoh kaba la ai sha u tei u nongialam, ka batai shai ba katkum ka Scheduled Caste bad Scheduled Tribes Orders (Amendment) Act 1976 ia kaba la pynthymmai da ka sorkar Assam ia kaba la tip kum ka Assam Scheduled Castes bad Scheduled Tribes Orders (Amendment) Act 2002 ia kaba la pynmih da ka tnad “Department of Welfare of Plains Tribes and Backward Classes, Government of Assam” ha u snem 2003 kam shym la ithuh ia ki ha khmat jong ka sorkar namar kam don ha ka Jingpynbna sorkar ka Assam Gazettes.
Hynrei ha u snem 2001 ka sorkar Assam kala ai ka jingithuh ia ki jaid bynriew Garo kum ki riewlum hapoh jong ka jylla Assam. Kane ka jingbym iathuh ia ki Khasi kum ki riewlum kala buh ia ki ha ka jingeh kaba khraw khamtam eh ia kiba leit ban pule sha ki kyrdan kiba kham sha jrong na ka daw jong ka jingduk jngkyrduh bad ka jingduna ha ka ioh ka kot bad kane kala pynlong 90% na ki samla pule ki hap ban pep noh ka jingleit pule ka jong ki.
