Shillong, Jymmang 24: Ka Khasi Students Union War Jaintia Circle hapoh ka jingialam u General Secretary Samla Lurman B Talang, ha ka jingdon lang kiwei ki dkhot ki la leit ban kynduh ia u CEO jong ka Land Port Authority of India kaba dei tnat treikam ba thymmai jong ka Sorkar India ha Tamabil.
Ka jingleit jong ka Seng ha kane ka sngi ka long ban dawa ba dei ban thep kam beit nyngkong da ki briew jong kane ka thaiñ namar ki don shibun ki samla bym ioh kam ioh jam kiba na kane ka thaiñ kiba dei hok ban ioh bad kiba la tbit bad kiba la pyndep ia ki jingpule jong ki.
Ka jingthmu jong ka Seng hi ka long ban khanglad ia kiba nabar ban knieh ia ka hok ki trai ri trai muluk ha ka liang ka thung kam thung jam.
Na ka liang une u Officer ba dei peit ia kane ka kam ula kular ha ka Seng ba dalei lei ruh un ym pdiang ia ki briew kiba nabar bad un thung shwa ia da ki briew kiba la long tbit ha ki kam ba iadei hapoh ka Land Port Authority of India.
Na ka liang ka Seng ruh ka la dawa ba ki briew kiba nabar kiba dei ki technician kiba ym lah da ki briew jong ngi ban leh, ki kot ki sla jong ki kidei ban biang katkum ka jinghukum na ki office ba dei peit ia ki kot ki sla.
Ka seng kan sa leit mih na ka por sha ka por ban peit bniah ia kane ka kam khnang ba samla pule kin lah ban ioh kam ioh jam ha kane ka port ba dang mih thymmai.
