Shillong, Rymphang 15: Ka Khun Hynñiewtrep National Awakening Movement (KHNAM) mynta ka sngi ka la mih sha khmat ban dawa na ka Sorkar Jylla ba ka dei ban pynduh noh ïa ka ‘Personal Interview’ ha kaba iadei bad ka jingpynrung kam ha ka Group-B, Group-C bad Group-D ha ki tnat treikam bapher bapher jong ka Sorkar Jylla.
Ki nongialam jong ka seng ki ba kynthup na duh u president U bah Thomas Passah, bad kiwei kiwei pat ki nongkit kam ba hakhamt jng ka seng ki la pynlong da ka jingteh ia ki banner hakhmat u durmot jong u Kiang Nangbah kum ka dak ban pynsngew ia kane ka jingdawa sha ki tyndong skhor jong ka Sorkar MDA-2 ba ialam da ka NPP.
Ha ka jingiakren bad ki lad pathai khubor, u Working President jong ka KHNAM u Bah Thomas Passah u la ong ba la shi snem mynta ka seng ka la phah ia ka jingthoh sha ka Sorkar ban kyrpad ba kadei ban pynduh noh ia ka ‘Personal Interview’ kaba pynlong ia ka jingthungkam na ka bynta ki post ha ka Group-B, Group-C bad Group-D ha ki tnat treikam bapher bapher ka sorkar jylla hynrei ka Sorkar kam shym la sngap satia ia kane ka jingdawa jong ka seng.
U la ong ruh ba Sorkar India naduh u snem 2016 ka ladep ban pynduh ia ka ‘Personal Interview’ ha ki 23 tylli ki jylla ka ri India hynrei kaba lyngngoh ka long ba ka Sorkar Meghalaya kam pat lah satia ban bud ia kane ka nuksa ba la leh da ka Sorkar India.
Haba pynksan ia kane ka jingdawa, u Bah Passah u la ong ba ka jingdawa jong ka seng ban pynduh noh ia ka ‘Personal Interview’ ka long ban wanrah ia ka rukom thungkam thungjam kaba khuid bad suba bad kaba bym don jingiashah liang ha kaba ki nongthep kam kim dei satia ban wad jingiarap na ki riewsaiñ ban ioh ia ka kam kaba ki la aplai.
U bah Passah u la ong ruh ba ki don ki MLA ki ba la kren teng ia kane ka mat ha poh ka Assembly hynrei na ka liang u Chief Minister u la jubab ba kane ka jing dawa ban pynduh noh ia kane ka personal Interview ka lah ban don ka jingioh nong bad kumjuh ruh ka jingduh nong ia ki samla.
U la ong ruh ba na ka liang ka KHANM ka la pan ia ka jingpynshai na u CM ba kiei kita ki jingioh nong ha ka ba iadei bad ka jingdon ka Personal Interview. U bah Passah u la ong ruh ba na ka liang ka KHNAM kan iai bteng ia kane ka jingshong kylain mongor ha kane ka jaka la kumba kato katne sngi khnang ba ka sorkar kan ioh sngew ia ka jingdawa jong ka KHANM.
