Shillong, Kyllalyngkot 11: Ka People’s Rally ha dien ka jingiaid paidbah kaba la sdang na Mawdan Iewrynhep Laitumkhrah bad pynkut ha Jaka ieng kali Additional Secretarait, ha kaba palat hajar ngut ki briew kila ia poi na kylleng kila leit ban ai da ka jingthoh sha u myntri rangbah ka jylla u Dr Mukul Sangma ha kaba kila buh khyndai tylli ki mat jingdawa b aka sorkar ka dei ban leh.
Ka jingdawa kaba ha khmat eh ka long ba u myntri rangbah ka jylla u dei ban bthah ia u myntri kam poh iing u Bah HDR Lyngdoh ba un hiar shuki noh kum u myntri kam poh iing bad lada u myntri rangbah u leh ia kane kin wad ki lad ki lynti ban pynhiar shu ki da u paidbah.
Kiwei ki jingdawa ka long b aka sorkar ka dei ban pyntrei kam ia ka POSCO Act, 2012, ka sorkar ka dei ban buh ia ki Fastract Court ha baroh ki District jong ka jylla ban bishar tang iaki kam thombor ia ki kynthei.
Dei ban buh ia ki Complaint Committee ha baroh ki District hapoh ka ophis jong u Deputy Commissioner ba ki paidbah kin ioh ban leit ban ujor lada ka don ka jingshah leh bein jong ki kynthei ha kino kino ki liang, ka sorkar ka dei ban pynshai ha baroh ki skul, ki college bad sha ki dorbar shnong halor ka ain ban iada ia ki kynthei.
Baroh ki iing basah kiba la mih kyrteng kumba la phla da ka khynnah dei ban khang syndon katba ka jingtohkit ka dang iaid, Halor ka jingpynshlur ia ki kam jngohkai pyrthei ka sorkar ka dei ban don ki kyndon kiba eh ban khanglad ia kane ka jingiakhaii met.
Haba ia dei bad ka jingai jinghikai ia kaba la tip kum ka Skill Labour Training kaba la bei pisa da ka sorkar, ha ba ia dei bad kane ka skhim ka sorkar ka dei ban bishar biang ia ki mat trei kam jong ka. Ka sorkar ka dei ban buh ia ka Hot line hapoh jong ka State Commission for Protection of Child Right ba ki briew ki lah ban ai ia ki jingujor haba ka don kano kano ka jingshah leh bein.
Kiba bun na ki nongkren baroh ki pynrem jur ia kine ki jingjia baroh kiba la shah ktah ia ka long kynthei ha ki riew thom ia ki kynthei, kiba la kren ki long ka kong Theilin Phanbuh Chairperson jong ka Women, Commission, U Carmo Norata, u Bah Erwin Sutnga, Bah Thomas Passah, bad bun kiwei kiwei ki long kmie bad ki long kpa kiba la ia shim bynta ha ki jingkren bad kawei ka sur ka long ba ki pynrem ia kane ka jingjia ba kumno ki nongthawain kin kylla ki nongpynkhein ain.
Ha kane ka jingialang paidbah kaba la long mynta ka sngi la kyntu ia ki paidbah baroh ba lada don kano kano ka jingshah leh bein ne ka jingshah thombor ki paidbah ki dei ban pyntip bad kum ka seng CSWO bad ka TUR kin leit ban sei ia kito ki nongleh beijor ia ki kynthei khynnah. Ia ka jingthoh la leit sha ka Ophis jong u myntri rangbah ka jylla mynta ka sngi ban buh ia kitei ki jingdawa da ka kong Angela Ryngat president jong ka TUR bad ka kong Agnes Kharshiing president jong ka CSWO.
