Shillong, Rymphang 21: Ka FKJGP Sengkmie ka dap da ka jing sngew kyndit kaba khraw bad sngew lyngngoh shi katdei eh ban tip ba na ka liang jong ka Khasi Hills Autonomous District Council (KHADC) bad ka Uranium Corporation Of India Limited (UCIL) ki la dep ban soi ia ka Dulir Jing ia Sngewthuh Jingmut (Memorandum of Understanding) naduh ka 12th January 2006 bad ha kajuh ka por ban a ka liang jong ka Khasi Hills Autonomous District Council (KHADC) kala dep ruh ban ai jingbit ia ka Uranium Corporation Of India Limited (UCIL) ban khlong noh ia u Uranium uba don ha ki bynta jong ka Kylleng Pyndeng Sohiong – Mawthabah, lyngba ka No Objection Certificate ia kaba la ai ha ka 14th February 2007.
Ka FKJGP Sengkmie Sngew ba ka jingiasoi ia katei ka Dulir Jing ia Sngewthuh Jingmut (Memorandum of Understanding) hapdeng jong ka Khasi Hills Autonomous District Council (KHADC) hapoh ka jingialam jong u Bah H.S. Shylla kum u CEM ha kito ki por bad u R.Gupta, Chairman & Managing Director Uranium Corporation Of India Limited (UCIL) ha ka 12th January 2006 bad kumjuh ruh ia ka jing ai ia ka No Objection Certificate ia kaba la ai ha ka 14th February 2007 ka long pyrshah ia ka mon jong u paidbah. Kum ka Seng kaba imsngi ban peitngor ia ka bha ka miat bad kaba don ia ka jing sngew khia na ka bynta ki jingeh jong ki para doh ki para snam kam lah satia ban shu shong kli kti ban sngap jar ia kaba pisa kaba la dep ban sei haduh 36 Klur Tyngka ha ka kyrteng jong ka roi ka par.
Ka Seng ka sngew sammut ban iohsngew ia kita ki kyntien ieit Jaitbynriew jong kiba bun ki MDC “Mynba ki dang don ialade ha ka bor ki Khein Dewthala ia ka Khet ba kyntang jong ka Jaitbynriew, Ynda la shah sloit pat ka Iktiar ki sdang ban ialam bakla ia u Paidbah”. Ka FKJGP kan ym aili satia ia ki Kyndang Kwah kiba Long Ka Daw bah na ka bynta ki jingeh jong ka Jaitbynriew, ha kajuh ka por ka Seng ka Dawa na u Bah Pynshngain.N.Syiem Chief Executive Member (CEM) ba mynta jong ka KHADC ban thung da ka kynhun Tohkit CBI halor kane ka kam bad kum ka Seng kan sa bud dien ban sei madan ia baroh ki jing shisha ha kaba na ka liang jong ka Seng kan sa Dawa ruh ban pynshitom ia baroh kiba donkti ynda la dei ka por ong u Bah Palwanbor Syiem Vice ka seng President FKJGP central body.
