Shillong, Naitung 25: Ki Khun Ki Hajar ka Hima Mawsynram ia ki la leit ban ia kynduh ia U CEM ka KHADC Bah P.N.Syiem ha ryngkat bad u EM I/c Elaka jong ka KHADC Bah Latiplang Kharkongngor hynne ka sngi ha Kamra treikam jong ki hapoh District Council na ka bynta ban ia kren sani bha halor ki mat kiba iadei bad ki kynrum kynram kiba don hapoh ka Hima Mawsynram halor ka jingleh pyrshah jong u Pa’iem A.M.Syiem Malngiang ia ki khun ki hajar jong ka Hima Mawsynram bad ka jingpynkhein ia ki kyndon treikam jong ka District Council kiba la buh ryntih katkum ki Aiñ.
Ia kane ka kynhun la ialam da u Samla Banshai Marbaniang kum u Convener bad u ba bat ia ka kyrdan President jong ka Seng FKJGP Mawsynram Circle. La ia snoh kti lang ruh da ki Rangbah Shnong kiba hap hapoh ka Hima Mawsynram, ki Riew Rangbah bad kumjuh ki Samla Rangbah kiba don ia ka jingkitkhlieh ia la kajong ka Hima kaba la sdang ring swai na ki daw ki ba bun. La ioh ruh ia ka jing ia snohkti lang na ka Seng HYC Mawsynram Circle, HANM Mawsynram bad ka HNYF Mawsynram na ka bynta ki mat kiba iadei bad ka Hima baroh kawei.
Ka kynhun kala pynpaw ia ki jingeh kiba bun kiba kum ki khun ki hajar jong ka Hima baroh kawei ki iakynduh khamtam eh ha kaba iadei bad ka jingbym suid niew bad khein snep jong u Syiem iaka hok kum ki paidbah nongshong shnong jong ka Hima.
Ka kynhun ka la dawa ruh na u CEM bad EM ban weng noh shi syndon Ia utei u Syiem na ka shuki ba u bat mynta khnang ban wanrah biang sa shi sien ia ka jingsynshar kaba khuid bad ba suba kumba la angnud da ki khun ki hajar da ki phew phew snem kumba la iaid kat haduh mynta.
Ka kynhun kala pynpaw ruh ha khmat jong kitei ki nongialam ba rangbah jong ka KHADC ba naduh ba u Pa’iem Amossingstar Malngiang u la shimti ia ka khet naduh u snem 2010 kat haduh mynta um shym la lum la lang ia ka Dorbar pyllun jong ka Hima kaba la pynkylla long ia u Khun u hajar ban sah ha ka umdum haduh kine ki sngi kiba mynta.
Ka kynhun ka la kdew ruh iaka jingpyndonkam bakla jong u Syiem ia ki jaka ki puta hapoh ka Hima khlem da kynjoh ktien ne wat ban bishar bniah ia ki jaka da kaba pyrshang ban lilam noh sha kiwei pat ki bym don ka hok wat ban long trai.
Ka kynhun ka la pynpaw ruh ba watla na ka liang jong ka Dorbar Shnong Mawsynram ka la kdew pyrshah ia ka jinglong trai ia ki jaka ki puta hapoh ka Hima naduh ki Syiem tymmen kiba la leit noh hynrei kaei kaba sngewsih kalong ba ha kane ka kynti kaba mynta une une u Syiem um shym la khein snep bad burom wat tang khyndiat ruh ia kaei kaba nakaliang jong ka Dorbar Shnong ka la kyrpad bad u shu iai sngap mynthi haduh mynta khlem da leh eiei ruh em.
Ka kynhun kala pynpaw ruh ba ka jing bymlah jong u Syiem ban wanrah ia ka jingshai ha kaba iadei bad ki jaka ki puta hapoh la kajong ka Hima ka la pynkylla long pynban ban poi shaduh ka jingia sngewsih hapdeng ki shong ki thaw bad kumjuh ruh ia ki khun ki hajar jong ka Hima.
Shuh shuh ka kynhun kala kdew ruh ba ka jingleh shimet bad ka jingjied ia ki Dkhot jong ka Executive Durbar jong ka Hima da kaba leh hi tang na lade shimet khlem ka jingtynjuh lem ne wat ban wanrah ha ka jing ia pyrkhat lang jong u paidbah paidlang lyngba ka jing mynjur jong ka Dorbar Hima ka la wanrah ia ka jingsngewsih bad iam kthang jong u ba bun ba lang.
Ka jing bymlah ban pynshai ha kaliang ka ioh ka kot jong ka Hima baroh kawei kumjuh ruh ha kaba iadei bad ki jinglut jingsep kiba ka Hima ka pyndonkam ka la pynkylla long pynban kum ka kam shimet jongno re jongno.Ka kynhun kala pynpaw ruh ba ka jingbym tip jong ki khun ki hajar jong ka Hima ia ki kam ki jam kiba syrtap hapoh jong ka imaHHhhhhhhjjjljmlkajscdHJACNZXK/jkjjJjjHiHIhiiikincnzcnzx.m,cn xm.,vnm, ka la wanrah , ka la sdang ban wanrah iaka jing ring swai jong ka Hima suki pa suki.
Watla bun na ki khun ki hajar ki tip pyllein ba kadon ka jingmih ha kaba iadei bad ki Iew ki Hat hapoh la kajong ka Hima, pynban kaba sngewsih kalong ba kat haduh kine ki sngi kiba mynta ym shym la iohi ba kan don ka jingpynbha ia ki jaka puta hapoh ki iew ki hat ne wat ban pynlut tang shi byrni ka dewbilat ruh kalong kaba eh haduh katta katta. Kane baroh kala shu long pynban kum ka jaka kamai pisa jong u Syiem bad ki katto katne ngut kiba iadon bynta lang ha kajuh ka jingthmu.
Ka jingsloit noh bad khein dewthala ia ka iktiar jong u khun u hajar jong ka Hima baroh kawei ka la pynkylla long ban wanrah iaka jingring sdot bad ring swai ka Hima da kaba khanglad ruh wat ia kiba bun ba ba lang ban iashim bynta lang ha kaban saindur iaka Hima katkum ka jingiaid jong ka por.
Ka kynhun ka la dawa beit shisyndon ban wanrah iaka jingbishar kaba khuid hapoh ka Hima Mawsynram da kaba weng shi syndon ia u Pa’iem A.M.Malngiang na ka shuki bad ban thung shuwa da u Acting Syiem katba shah ka kam kat haduh ban da ioh iaka jingsynshar kaba khuid pura kumba la angnud.
Nakaliang jong U CEM ka KHADC Bah P.N.Syiem ula pynpaw ba un sa shim ia ka bynta kaba ha khmat bad kongsan eh da kaba wanrah ia ka jingsynshar kaba khuid lyngba ka jing bishar kaba bniah da kaba ia biang lang baroh.
Nakaliang jong u EM Elaka Bah Latiplang Kharkongor u la pynpaw khatduh ha ki nongialam jong ka kynhun ba kum u Syiem umlah da lei lei ruh ban kurup jubor ia ki jaka puta kiba hap hapoh ka jingpeit ki Dorbar Shnong bad nakaliang jong u Syiem ka kamram jong u kalong ban wanrah iaka jingkhuid jingsuba bad ka jingshong suk hapoh la kajong ka Hima ia u Khun u hajar baroh. Kumta u la pynpaw ba nakaliang jong u un sa khot ia ka jingialang kaba kyrkieh badc kaba kyrpang da kaba bishar bniah ia ka jingud jingnam jong ki Paidbah ka Hima Mawsynram bad ruh u la ong ba lada lap ia ka jingshisha khlem pep un sa shim ia ka rai kaba donkam bad kaba khatduh.
U Samla Banshai Marbaniang haba pynpaw sha ki lad pathai khubor u la ong ba kum u Syiem u kmie ka kamram kalong ban synshar da kaba wanrah ia ka jingshong suk bad palei mynsiem ki khun ki hajar ka Hima bad ruh ban pynbeit ia ki jingeh kiba kum ki paidbah ki iakynduh. U La ong ruh ba ymdei ban wanrah pynban da ka jingsynshar kum u Syiem Mraw da kaba pynsngewsih bad pyn pang nud ia ki khun ki hajar jong ka hima da kaba pyrshang ban leh donbor bad ruh ban pyni bor khlem da burom ruh iaka burom ka ijot u paidbah paidlang.
U la ong ba kaei kaba jia ha ka synshar Syiem hapoh ka Hima Mawsynram kam I dei shuh ban ong ba ka Synshar u Syiem U Kmie, pynban kala kylla long mynta kumba ka paw tyngkrein ka la dei ka Synshar Syiem Mraw. Balei ka pynkylla long ban kren kumtei kadei halor ki kam sop sop bad buhrieh jong u Syiem ia kiba bun ki bynta khamtam eh ka jingbymlah ban lum iaka Dorbar Hima mynta la kumba 7 (Hynniew) Snem ne tam kaba la wanrah iaka jing sngewsih ia uba bun ba lang. Lada ia ki kam jong ka Hima yntip noh tang da U Syiem bad ki ktatto katne ka jingkylli kaba mih mynta ka long la hato kaei mo ka jingmut kaba kum ki khun ki hajar kiba shong ba sah hapoh la kajong ka Hima kidon bynta.? Lada ka jubab kalong ba kidon ka bynta kaba kongsan te balei pat yn leit jia kumne kumba ka long mynta, hynrei lada ka jubab kalong em..kata kamut ba la sngewthuh pyllein ba kum ki paidbah, ngila shah khein kum ki mraw ha la kajong ka Hima.
U Samla Banshai u la pynpaw ruh ba dei ban bishar mardor khlem da pynslem ia kane ka jingdawa jong uba bun ba lang bad ruh ban bishar bniah bad ban buh jingthoh ryntih naduh u Pud U Sam jong ka Hima Mawsynram baroh kawei ha ryngkat ki riti treikam kiba long ki dustur tynrai ba nylla jong ka Hima kiba la iai neh iai sah kumba la buh da ki Longshuwa ki Manshuwa haduh kine ki sngi kiba mynta, khnang ba sa shisien ngin iohi bad wanrah ia ki jingkylla kiba bun katkum ka jingiaid jong ka kapor ia ka jingling kyntang bad kyrpang kum ka Jaidbynriew Khasi ha shi tyllup. Kane kan wanrah ia ka jingshai ha kiba bun bad kan sam bynta hangi mynta ha kaba ki paidbah kin ym iai sah shuh ha ka lyngngoh ka lyngngaiñ kumba ka long kat haduh kine ki sngi mynta.
Ka jingleh bad treikam jong u Syiem ka Hima Mawsynram ka la long pyrshah ia ki Aiñ katkum ba la pynpaw lyngba ka Notification The 20th August, 2015 Part IV Section (9) Sub-Section (6) clause (a), (b), (c) bad (d) kiba na kaliang jong ka KHADC kala pynmih lyngba ka Appointment and Succession of Chiefs & Headman Act 2015.
