Shillong, Iaiong 11: Da ki spah ngut ki nongtrei sam shana ha kane ka jylla Meghalaya mynta ka sngi kila pynlong ia ka jingiaid paidbah ban dawa ia ka hok ka jong ki ia kane ka jingiaid la pynlong hapoh jong ka lama Meghalaya Anganwadi Workers and Helpers Union (MAWHU) rygnkat bad ki ba trei ia ka kam Asha hapoh jong ka lamah Asha Workers Union (AWU).
Ha kane ka jingiaid paidbah ka jong ki kila ia pyrta da kaba ong ba ki dawa ia ka hok ka jong ki ba ka sorkar ka dei ban siew ia ki katkum ka kam kaba ki trei.
Haba kren ha ki nongthoh khubor ka kong Diangtimai Lyngdoh Secretary jong ka MAWHU kala ong ba ia ki ym shym la siew katkum ka dor, namar ha kiwei ki jylla kiba trei ia kane ka kam ki ioh tam nalor ka dor ba la buh ki ioh sa ka jingsiew tam kaba T.500 lane T.1000 tyngka, katba ki nongiarap ki ioh T250 lane T.500 tyngka.
Ka kong Diangtimai Lyngdoh kala ong ba ka sorkar Meghalaya ka la phah sha Delhi ba kala siew tam ia kid a T.50 tyngka hynrei ka jingshisha ka long ba wat ia katei ka T.50 tyngka ruh kim shym ioh satia.
Haba kila ia kynduh ia ki heh sorkar kiba dei peit ia kane ka kam, ki la ioh ia ka jubab ba ia kane ka T.50 tyngka la pynlong ia ki ha ka RBSY schemes hynrei ka long kaba lyngoh ba wat ia kane ka skhim ruh kim ioh namar ym shym la pynrung ia ka kyrteng jong ki.
Kine ki ba trei ia ka kam sam shana bad kiba trei iaki kam iarap ia ki nongpang ban rah sha ki jaka ai jingsumar ha ki shnong ki thaw sha ki hospital ki dawa na ka sorkar ba dei ban ithuh noh ia ki kum ki nongtrei sorkar ha ka kyrdan Grade III bad Grade IV namar ka kam kala khia palat.
Ha ka juh ka por la dawa ruh ba ka sorkar ka dei ban siew ia ki ia ka bai leit ban wan ka jong ki namar ki hap ban iaid bad ban mih man ka sngi la pynsngew ka kong Lyngdoh.(SP News)
