Shillong, Nailar 17: U Zenith M Sangma MLA jong ka seng Congress ba dei ruh u secretary jong ka AICC mynta ka sngi la pyntip ba la thung kham haduh 124 ngut ki briew hapoh jong ka MeECL khlem da khot advertisement bad kine kiba la thung baroh ki dei tang na Shillong bad mar khap jong ka sor Shillong.
La iathuh ba ha ka 26th Jylliew 2020 la thung 52 ngut ki briew bad ha ka 1 Naitung 2020 la thung sha 72 ngut ki briew bad baroh kine la thung ha kata ka kyrdan kaba la tip kum ka “Multi Tasking Attendance”.
U tei u nongialam jong ka seng Congress u la kynnoh bala thung ia kine ki briew khlem da but ia ka polisi bhah kam jong ka sorkar jylla bad kiba la shah thung baroh ki dei tang ki khasi na Shillong bad mar khap ka sor Shillong dei halot kane ba ka Congress ka dawa ban phah tohkit da ka kynhun ba laitluid.
La kynnoh ruh ba ka jingai kam kontrak ha kaba ia dei bad ka skhim Saubhagya u la ong ba ia ki kompeni kiba na Mumbai bad Delhi ha ai kontrak ha ka dor palat 15% na ka dor ba la buh katba ia ki kontrak tor kiba na ka jylla pat la ai katkum ka dor kumba la buh.
Haba ia dei bad ka jingthung ia ka Chief managing Director da ka ophisar kaba kham rit kyrdan ban peit ia ka MeECL na ka liang jong u Zenith u la ong ba kane kala pynsuba sniew ia kane ka sorkar. La ong ba ha ki por kiba la leit la thung ia u ne ka CMD kiba dei ha ka kyrdan Principal Secretary, Additional Chief Secretary lane ha ka kyrdan Chief secretary.
Na ka liang jong u tei u nongialam jong ka seng Congress u dawa ba u myntri rangbqah ka jylla u dei ban jubab kloi mar dor halor kine ki jingkynnoh kiba ka party congress kala kynnoh pyrshah ia ka sorkar.
La ong ba kane ka dei ka kompeni jong ka sorkar kaba heh duh kaba lot kot sha ka T.2000 klur tyngka bad ki nongtrei kila don haduh 4000 ngut, hynrei kane ka jingleh jong ka sorkar ka kdew shai ba kam don ka jingkit khlieh ia kane ka compeni kaba ki paidbah ki don kam ia ka man ka sngi.
