Jowai, Jylliew 20: Ka Jaintia students’ Union haka jingpyllait khubor mynta ka sngi, ha dien bala ia kynduh ia ka Principal jongka Kiang Nangbah Govt. College Jowai ka kong JMQ Lyngdoh kala dawa naki bor pyniaiad jongka College bad kumjuh naka sorkar ba kadei ban pynioh rung Klass ia baroh ki samla pule kiba la dep ban thep iaka Application jongki haki kyrdan bapher bapher.
Ka JSU kala pynpaw iaka jingsngewkhia kaba haduh katta, namar kane ka jingkhap ngiah bad ka jingjynjar ban ioh rung Klass ki samla pule dei namar ka jingkhein stieng bad ka jingbym patiaw satia ka Education Dept bad kumjuh ka Sorkar.
Na ka liang ka JSU, hadien ba kane ka jingeh kala sdang ban mih hapoh ka KNGC naduh kine ki khyndiat snem kiba la dep, kala dep thoh bunsien bad la ia kynduh ruh ia u Minister I/c Education Dept. Prof. R.C Laloo mynshem snem, bad ha ka por ba ia kynduh u Prof. ula kular ban shimkhia ia kane ka bynta da kaba u la ong ba shen yn ai noh iaka Scheme naka bynta ban shna ki Kamra Klass Additional Class Room.
Hynrei kaba sngewsih ka long ba haduh mynta ym pat lah satia ban pynioh ia kine ki Kamra Klass, ha kaba ka building jongka KNGC Jowai ka neh kumjuh haduh mynta khlem da don ka jingkylla, bad kane kala pynkthang iaki Samla Pule ban ioh rung Klass hapoh ka KNGC khamtam kito ki bym iohlad ban leit sha ki Skul lane ki College Shimet.
Kumta ka JSU kala dawa ba dei ban pynioh bad pynrung Klass ia baroh ki samla pule, namar kane kam dei shuh ka sien kaba nyngkong hynrei ka dei ka jingleh klet bad ka jingleh bymsuit niew jongka Sorkar iaka jingdawa jongki samla pule kane ka College kaba la dawa naka por sha ka por. Lada jia ba ki Samla kim ioh rung Klass ka Sorkar ka dei ban don ka jingbah khlieh namar ngim kwah ban iohi lane ioh sngew ba ka Sorkar ka heh tang ka ktien ban kyntiew iaka pule puthi hapoh ka jylla jongngi khlem pyni daka kam.la ong u bah Rikut President jong ka seng JSU.
