Shillong, June 04: U Dr Donkupar Roy nongialam jong ka kynhun ia treilang ka UDP-HSPDP u la ther kylla ia u Dr Mukul Sangma myntri rangbah ka jylla da kaba ong “ dei ka jingbymler ka sorkar Congress ha centre bad ha ki jylla ba ka seng BJP ka sa kiew skong”. U la nongialam ka liang pyrshah u la ong ruh ba u sngewlyngoh ban iohi ia ka jingkynthoh na u myntri rangbah khamtam na u Dr Mukul u ba la iehbha ha ka sain pyrthei ban ong ba ka jingiatehlok UDP bad ka BJP ka dei kaba na sha lyndet jingkhang.
Ha ka kyrwoh kaba la phah mynta ka miet sha ki lad pathai khubor u Dr Donkupar u la ong ba “ ngi ngeit ba ka don tang kata ka jingiatehlok shuwa ka election lane ha dien ka election, kata ka jingiatehlok kaba na shalyndet ka jingkhang kam juh don, kane ka jingkren jong u myntri rangbah ka long ba u la dukha palat ia kane ka jingiateh lok ka UDP bad ka HSPDP.
Baroh ki briew ki tip ba kam shym don kata ka jingiatehlok bad ka BJP, balei u Dr Mukul yn kynnoh ia ka seng riewlum ha kaba ia dei bad ka jingkiew jong ka BJP, ka dei ka jingbymler jong ka seng Congress kaba la pynlong ia ka BJP kan kiew ha ka sorkar pdeng bad kum juh ha ki jylla, la kynthoh u Dr Donkupar.
Peit nuksa ha Assam ki nongialam jong ka seng Congress ki leit sha ka BJP, ha Meghalaya ruh ki nongialam jong ka seng Congress ki leit sha ka BJP, wat hapoh Shella Constituency ruh kum ki nongialam jong ka Congress ki leit sha ka BJP, peit na Sohra u Dr P W Khongjee MLA barim jong ka seng Congress u a leit BJP kane baroh ka dei na ka jingbym lah trei kam jongu myntri rangbah ka jylla u la kynnoh.
Lada ka BJP kala sdang ban kiew ha kane ka jylla Meghalaya, ka daw baroh ka dei na ka jingbym lah trei kam jongu myntri rangbah bad ka jingbym lah jong ka seng Congress ban synshar kala pynlong ia ka seng BJP ba kan kiew ha kane ka jylla. Hynrei u kyrmen ba ki seng riewlum kin thaw ia ka sorkar ha u snem 2018 ha dien ka election.
