Jowai, Nailur 15: Ka Dorbar shnong Mynsngat ka pynpaw iaka jingsngew thamulla ban iohi iaka jingkren u CEM ka JHADC Ma Thombor Shiwat, ha kaba u la ong ba ka Konsil kan sa hiar tohkit iaka kam ia waheh Shnong ka Shnong Mynsngat. Kane ka pyni ba ka don ka ei re ka ei ka jingthmu kaba sha lyndet jong ka Konsil ha kaba iadei bad kane ka bynta.
Lada ka JHADC ka hap ban hiar tohkit iaka kam waheh Shnong, hato kane ka mut ba ka District konsil kam shaniah shuh lane kan knieh noh iaka bor jong ki Daloi kiba kala pynkhamti ban pyniaid iaka kam iajied Waheh Shnong ha kino kino ki shnong. Haka jingshisha haka sngi bala iajied Waheh Shnong (20/04/2016) u Agent jong u Daloi ka Elaka Nartiang u la donlang, bad dei ma u uba pynskhem iaka kyrteng u waheh Shnong ba thymmai u ba la shah jied haki paidbah daka jingiathep Vote, bad ha ka juh ka por ula pynskhem ruh iaka samoi treikam jong u Waheh Shnong kumba 3 snem kaba dei beit thik katkum ka rai jongu Paidbah ba bun ba lang khlem da don kano kano ka jingartatiern lane ka jingpyrshah.
Kumta na ka liang ka Dorbar Shnong ka pynpaw ba lada hap hiar tohkit ka JHADC, kane ka pyni ba ka Konsil kala pyniap bad iuhroit iaka bor jongu Daloi, bad ngeit beit tang iaka jingujor jongki 11ngut ki briew. Ym tang katta ka konsil hi ka khlem sngap pat iaka jingujor kylla da ki spah ngut ki paidbah pyrshah ia kitei ki 11 ngut ki nongujor kiba la leh bor da kaba pynsoi jubor iaki katto katne ki briew bad pyndonkam ruh iaki Seal Dong khlem da don jingtip lane rai ka dong, bad ia kane la sakhi haka jingialang jongka dong pohmadan kaba la long haka 30/05/2016 ha kaba 80 ngut ki paidbah kila soi kyrteng ban pyrshah ia u Chairman bad Secretary namar ka jingleh stad ban ujor pyrshah ia u Rangbah Shnong thymmai haka kyrteng ka Dong khlem kano kano ka jingtip. Ia kane ka kyrteng jongki 80 ngut ruh la rah ha khmat u CEM bad ka AO, hynrei ki khlem sngap ei ei ruh em.
Ka Dorbar Shnong Mynsngat ka la kynthoh shuh shuh, ba ka jingujor ban pynioh sanat ia u Waheh Shnong tang 1 snem imat kala dei shisha ka kam politic jongno re jongno namar ki shep tieng eh ia u snem 2018 bad 19 wat lada ka shnong kam don satia kum katta ka jingmut ban pyniakhleh iaka kam politic bad ka kam Shnong. Lymkumta u CEM bad ka AO ki dei ruh ban kynmaw bad bishar iaka jingkhot hajir haka 10 August 2016, ha kaba don katno ngut na ka liang kiba ujor bad kattno phew ngut na ka liang ki nongshah ujor lane ka liang u waheh shnong.
Khatduh khatwai ka dorbar Shnong ka kwah ban tip hato ka Konsil kan iashah ia ki 11 ngut lane iaki paidbah jong ka Shnong baroh, lane ka kwah ban pyllong kam politic iaka kamshnong ne, Pynkut ka kyrwoh khubor.
