Jowai, Nailar 22: Ka Jaintia Students’ Union (JSU) sengkmie ka haka jingpyllait khubor mynta ka sngi kala kynthoh jur halor ka jingdkhoh treikam palat ka Ophis jong u DTO jowai, ha kaba kane kala pynsohsat ia ki paidbah kiba leit donkam sha kane ka ophis namar ki la lut kai ka por bad ka pisa.
Ka JSU ka pynpaw ba kane ka jingdkhoh treikam jongka Ophis u DTO jowai dei namar ka jing bym treikam ki bor Komputer, ha kaba ki nongtrei jong kane ka ophis kim lah shuh ban trei lane ban bteng iaka jingtrei jongki hapoh kane ka ophis, bad baroh ki kam jongki paidbah hapoh kane ka ophis kila sahkut mynta la kumba ar taiew ei ei.
Ka JSU hadien ba la ioh iaka jingujor naki paidbah halor kane ka bynta, ki la lei twat jingtip na kane ka ophis ha kaba la ia kynduh ia u DTO u Bah P. Laloo ha kaba ma u ruh u la kubur ia kane jing sniew jong ki kor computer kiba don hapoh kane ka ophis kila sniew bad ym lah shuh ban trei iaki kam ki jam kumba juh trei namar mynta la hap beit ban trei lynba kine ki machine ym kum mynshwa ban trei beit daki kti.
Ha ka jingia kren bad u DTo, u la pynshai ruh bana ka liang jongu u la dep pyntip sha u Commissioner Secretary jongka Transport ha kaba iadei bad kane ka jingeh bad haduh mynta yn patlah ban maramot lane ioh ia ki tiar kiba biang. Ka jingsniew jongki kor computer hapoh kane ka ophis kam dei satia tang ha kane ka sien hynrei bara bor naka por sha ka por bad kane kala pyndik shiaha iaki paidbah namar lada ki slem pat maki ban ioh renew iaki kot kali bad kiwei kiwei maki kin ngat haka Fine.
Shuh shuh ka jsu kala lap ruh iaka jingduna palat ki nongtrei hapoh kane ka ophis, ha kaba kane ruh kala ktah palat iaki paidbah kiba wan donkam shapoh kane ka ophis ha kaba ia ka kam kaba dei ban dep shi sngi la hap ban pyndep shi taiew ar taiew. Ia kene ruh na ka liang u DTO u la ong ba naduh ki por u DTO barim ruh kila dep thoh sha ki bor ba halor ban pynioh nongtrei shuh shuh hapoh kane ka ophis, hynrei haduh mynta ym pat ioh satia wat lada u la dep pynlkynmaw naka por sha ka por.
Kumta na ka liang ka JSU, ka dawa ba ka tnad Transport jongka sorkar jylla ka dei ban pynbiang iaki jingduna hapoh kane ka ophis, ym ban tip lane kitkhia tang ban ioh khajna naki paidbah.
