Shillong, Nailar 17: U Secretary jong ka AICC u Zenith M Sangma jong ka party Congress mynta ka sngi la ong ba ki don ar tylli ki mashim pynmih bording jong ka MeECL kiba la duh ha kaba khlem lah ban maramot mynta ia ki la shisnem lynter bad kane kala wanrah ia ka jingduh nong ia ka Corporation palat T.100 klur tyngka ha ka shisnem.
Haba kren ha ki lat pathai khubor mynta ka sngi ha Congress Bhavan u la ong ba kine ki mashin kiba duh, ka long kawei ha Stage-1 bad kawei ka Stage-IV jong ka Umiam Hydel Power Project. Kawei kawei ka mashin ha ka shi sngi ka lah ban pynmih bor ding haduh 30MW bad ar tylli ha ka shi sngi ki lah ban pynmih haduh 60MW.
La ong ba lada shim ha ka dor T.2.50 tyngka ka dor bai light ha ka shiunit, ka jingduh kala kot sha ka T.36 lak tyngka ha ka shi sngi bad ha ka shibnai kala kot sha ka T.10.8 klur tyngka bad ha ka shisnem kala long palat ia ka T.100 klur tyngka ka jingduh jong ka MeECL.
Ka jingkhein kaba la ai da u Zenith haba pynshong nongrim ia katei ka jingduh ka long ba 60 mw x 1000 unit ka long 720000 unit ha ka dor T.2.5 tyngka kala kot sha ka T.36 lak tyngka ha ka shi sngi. Kitei ki ar tylli ki mashin kiba la duh ki dei hapoh jong ka Umiam Hydel Power Project.
Haba ia dei bad ka ram kaba ka sorkar kala bah khlieh na ka bynta jong ka MePDCL ban shim haduh T.1345.72 klur ban siew ia ka ram sha ki kompeni sam bor ding kum ka NEPEECO, NPTC bad kiwei kan long ka jingban khia ia ka jylla baroh kawei.
Ha ka jingshisha ka sorkar ha ka jaka ban shim ia katei ka ram ka la dei ban pynbha ia ki tei ki ar tylli ki mashim bad ia ka jingmih dei ban siew ia ka ram bai ding sha kitei ki kompeni kiba dei jong ka sorkar pdeng. Kane ka jingleh ka pynioh nong ia ki kom peni ka sorkar pdeng u la ong u Zenith Sangma.
La iathuh ba kawei ka mashin habapoh jong ka Myntdu Leshaka Hydel Power Project kaba lah ban pynmih bor ding 42 mw kala duh bad ha ka jaka ban phah tohkit ka sorkar kala weng kam pynban ia uwei u engineer u bad kane kala wan rah ia ka jingiakhih ha pdeng ki engineer. Kane ruh kala wanrah ia ka jingduh da T.25 lak tyngka shisngi ia ka MeECL.
