Shillong, Rymphang 09: Ki nong ia lam jong ka seng Hynniewtrep Youth Council ha poh ka jingialam u President u bah Roy Kupar Synrem mynta ka sngi ki la ioh pat ban ia kynduh ia u Director ka NEIGRIHMS ban ia kren ha lor ki mat ki ba iadei bad ka jingpynrung kami a ki samla ha kane ka Hospital khamtam ha jingpynrung kam ha ki kam jong ka Nursing bad kiwei kiwei pat ki post.
Ha kane ka jingiakynduh na ka liang u President u bah Roykupar Synrem u la ong ba na ka liang ka Seng ka la lah ban pynkoh nguh ia u director jong kane ka Hospital khamtam ha ka ba iadei bad ka jingthep kam ha poh ka Nursing Officer lyngba ka NORCET.
U bah Synrem ha ba kren sha ki ladpathai khubor u la ong ba na ka liang ka seng ka lah lah ban pynkoh nguh ia Director ha ka ba iadei bad ki kato katne ki mat jingdawa jong ka seng kham tam ha ka ba iadei bad ka jingthung kam ha ka kam Nursing.
Ia kane ka jingthung kam la pynlong da ka NORCET ha ka ba u la ong ba kane ka jingthung kam ka la pynduh nong ia ki khun samla ka Jylla ki ba dei ki trai ri tarai muluk bad u la ong ruh ba kane ka jingthep kam mynta ka kynti ki ba bun ki ba ioh ki dei ki samla shynrang bad tang khyndiat ngut ki dei ki samla kynthei.
U bah Synrem u la ong ruh ba na ka liang u Director u la pdiang ia ka jingdawa jong ka seng ha ka ban pynsangeh shwa shipor ia kane ka jingthung kam tad haduh ban da lah ban pynbeit pat da kumwei.
U la ong ruh ba ka daw ka ba pynlong ia kane ka Hospital NEIGRIHMS ban ioh bun da ki samla shynrang ka dei namar ba ki but beit ia ka jingpyniaid jong ka NORCET bad na ka liang ka seng HYC ka la buh ka jing dawa ba kane ka Hospital ka dei ban bud ia ki kyndon ain kum kiwei pat ki Hospital.
U Bah Synrem u la ong ruh ha kaba iadei bad ka jingthung kam ha poh ka Grade C bad D kane ka Hospital ka dei ban ai ka bhah ba kyrpang na ka bynta ki samla jong ka Jylla ha ka ba ka dei ban mang 80 percent na ka bynta ki samla jong ka Jylla.
u la ong ruh ba na ka liang ka seng kan iai budien ia kine ki mat jingdawa jong ka seng bad na ka liang ka seng kan sa leit ban ia kynduh ia ki bor ba halor ha kine ki sngi ki ban sawan.
