Shillong, Jymmang 06: U president jong ka Khasi Jaintia National Union (KJNU) u Bah Niman N Shadap, u la ong ba ka sorkar pdeng ka la dei ban ai noh ia ka Khasi Jaintia Land lane ka Khasi Jaintia State, ia kane u la kren ha ki nongthoh khubor mynta ka sngi ha Shillong press Club.
Haba jubab ia ki jingkylli jong ki nongthoh khubor u Bah Sahdap u la ong ba kane ka jingdawa Khasi State lada long kaba leh dei ban kynthup ruh ia ki katto katne ki bynta jong ka jylla Assam ha kaba ki khasi bad Jantia ki shong shnong, kum ka Block I bad Blcok II bad kiwei kiwei ki bynta.
Haba ia dei bad kane ka jingdawa na ka liang jong ka seng kan kwah ba kane ka jingdawa kan long katkum ka riti synshar paidbah jong ka Ri khlem da ia umsnam, u la ong ba kin sa phah da ka jingthoh sha ka sorkar pdeng.
U la ong ba lada ki Garo ki dawa ia ka Greater Garo Land na ka liang jong ka seng u la ong ba ki dawa ia ka Khasi Jaintia Land, kumba ki Assamess ki ioh ia ka jylla Assam, Mizo da ka Mizoram bad kumta ter ter.
Haba phai sha ka jingdawa Khasi Jaintia State jong u nongialam ka seng HSPDP u ba la khlad noh u Bah Hopingstone Lyngdoh, u la ong ba ha kaba sdang ki dawa ia ka Hills state bad ki la ioh bad mynta ki dawa ia ka Khasi Jaintia Land, kane ka dei ka jingïapher la ong u bah Shadap.
