Shillong, Rymphang 18: U bah Twirlele Wood Kharbuli Project Coordinator jong ka Shillong Science Centre la ong ba ka Meghalaya State Council of Science bad Technology bad Environment da ka jingiatreilang bad ka Vigyan Sarwatra Pujyate kin pynlong ka “Science festival” kaba shitaiew lynter ha Shillong.
Kane ka jingleh kmen kan sdang ha ka 22 tarikb ad kan kut ka 28 tarik mynta u bnai kaba dei ka sngi burom ia ka saian, kane ka jingrakhe ka long kum shibynta ruh ban rakhe ia ka jingdap 75 snem jong ka Ri India ha ka jinglaitluid na ka jingsynshar ki nongwei.
U bah Twirlele Wood Kharbuli la ong ba ha kine ki sngi ba don kane ka jingrakhe ki don shibun ki jingiamir jingmut da ki riew shemphang kiba bar ka jylla bad kum juh kiba na kane ka jylla, ka jingpynlong ia kane ka long ban pynshlur ia ki samla pule ba kin shim khia ha ka jingpule ha ka subjek saian.
Ha ka sngi kut jong ka “Science Festival” kan don ruh ka jingpynkup burom ia kito ki khynnah kiba ioh bun eh ka mark ha ka eksam matrik ba pass na ka MBOSE, ha ka sobjek Saian bad jingkhein, kane ka long ban kyntiew ia ka jingpule saian na ka bynta ki khynnah.
Ha kine ki sngi kin don kumba 20 tylli ki skul ki ban wan ia shim bynta lang bad kine kin wan hala ki jong ki jong ki sngi kam dei ha ka juh ka sngi namar hap ban bud ia ki kyndon kiba la buh da ka sorkar ban iada na kane ka khlam COVID-19.
Ha kane ka tamasa, la khot lang ruh ia ki trai jylla kiba la lap ia ki jingshna kiba thymmai katkum kane ka juk saian kaba mynta kiba don kumba san ngut kin wan ban ia shim bynta bad kin lah ban pynshai ruh ia ka jinglap ka jong ki. Ha kane ka sngi la don lang ruh bah Calmbert P. Syiem Project officer bad u bah Banjop Nongbri Junior mentor , Shillong Science Centre ha ba kren ha ki lat pathai khubor.
