Shillong- January 15: Ka jingpyninam jong ki lariti ka Ri India kan long ha nongbah Kathmandu, Nepal naduh ka 14 tarik Kyllalyngkot, 2017. Ka Tamasa pyninam lariti ba la jer, ‘Days of Indian Culture in Nepal: Namaste Nepal’ kan pynphuh pynphieng khamtam ïa ki lariti jong ka thaiñ Shatei Lammihngi jong ka Ri India.
Ka tamasa ba khatsaw sngi la pynlong da ka Indian Council for Cultural Relations (ICCR), Indian Cultural Center, Embassy of India, Kathmandu bad ka North Eastern Council (NEC). La plie ïa ka tamasa bah da u Nongkittiensyiem ka India sha Nepal, u Mr Ranjit Rae, ha kaba la Pyninam Thohdur da ka Riti Academy of Visual Arts ha ka ba ïadon lang kiwei kiwei ki kynrem ki lyndan na India bad Nepal, namar ba u Kongsan Mr Jiwan Bahadur Shahi, Myntri Lariti bad kiwei kiwei u la shimpor ban wanphai na Pokhara; jar la katta u la poi marbud ban khmih ïa ki dur thoh da ki kharar ngut ki barikor na ka thaiñ kiba phalang ïa la ka lariti jong kawei pa kawei ka jylla.
Katba u dang khmih kai u la kynthoh mardor ‘Ki don ki snap jong ki dur kiba ïa syryiem bad katto katne ki paidbynriew ha katto katne ki thaiñ ha Ri Nepal’. Shwa ïa kane ha ka jingïalang plie, u Nongkittiensyiem ka India sha Nepal, u Ranjit Rae u la sngewphieng ban sakhi ïa ki snap ka lariti jong ki paidbynriew bapher bapher na Shatei Lammihngi ka Ri India. U la kren skhem ‘Kane ka long ka sien ba nyngkong ba ki rong ki taw na ka thaiñ Shatei lammihngi ka Ri India yn pyninam ha Ri Nepal’; shuh shuh u la ong ‘Ngim pynlong tang ha nongbah Kathmandu, hynrei ngin pynphriang ïa ki sap ki phaong na ka thaiñ Shatei Lammihngi ka Rindia ha kylleng ki nongbah bad nongrit jong ka Nepal, kynthup sha Patan, Pokhara, Birgunj, Biratnagar, Dharan, Janakpur, Sindhupalchowk bad Dolakha.
Ka Pyninam Thohdur kan wai noh ha ka 18tarik Kyllalyngkot, 2017 bad yn sa bud da ka rong ka taw ha ka rwai bad ka shad ha kiwei pat ki sngi ba dang sah bad ki sur jingrwai bad jingput jingtem tynrai Khasi kin sa sawa ha them jong ki Lum Makashang ïa kiba la pynbit pynbiang da ka tnat Mattithaw bad Lariti jong ka sorkar jylla Meghalaya. Kan don ruh ka jingpynbyrngia da ka rwai ka siaw ka put ka tem da u khlur kaitor, u Baah Lou Majaw bad ka kynhun Shillong Chambers Choir. Nalorkata, kan don ruh ka pyninam thohdur thohdar da ka synjuk ki barikor, ka Riti Academy of Visual Arts, Shillong ha kaba ki lariti jong ka thaiñ yn sa pynpaw dur ban kham pynphuh pynphieng shuh shuh ïa ka tamasa. Ka ICCR ka la trei borbah ha kaba kyntiew ïa ki kaitor bad barikor na ka thaiñ ban pynpaw pyrthei ïa ki lariti bapher bapher sha satlak pyrthei.
U Regional Officer jong ka ICCR Shillong, u Bah N Munish Singh u la kren mardor ‘Kan long ka khyllipmat ban sah kynmaw ïa ki kaitor bad ki duhalia na ka thaiñ Shatei Lammihngi ka Ri India ban shem kum kane ka lad ban ïa rwai bad ïa put ïa tem ha rynsan ba ha satlak pyrthei’. Shuh shuh, u la pynpaw ka jingkmen ban rah ïa ki sur tynrai Khasi shabar na la rympei, ‘Nga lah ju ïai thrang ban pyninam ki sur jingrwai bad jingtem Khasi tynrai ha ki lympung bah ka pyrthei, kumba nga lah ju shim khia ban sngewthuh bha shaphang ki tara jong ki sur Khasi’.
Nalor kata, u Bah Singh u la kynthup sa kawei pat ka bynta jong ka sap tynrai na ka thaiñ, ha kaba u la aiti ha ka synjuk ki barikor, ka Riti Academy ban pynbit pynbiang ha ka liang ka thohdur thohdar, kum shi bynta ha ka tamasa. Hapoh ka jingïalam jong u Bah Raphael Warjri la kynshew ki dur thoh na kylleng ka thaiñ ban pynpaw ïa la ka lariti ba shongkun hakhmat ka pyrthei. Watla ka mait phang jong ka tamasa ka long ban pyninam ïa ka lariti, u Bah Raphael Warjri u la kdew ‘Ka jinglong jingman jong ka pyrthei mynta ha kine ar tylli ki thaiñ ka long ka jingshongsyier na u jumai, kumta ka snap tynrai Khasi halor u jumai ka don ka khubor bakhraw ban pyntngen bad pynshngaiñ ïa la ki para bynriew lyngba ka thohdur ba la sot na ki khanatang Khasi’.
Ka North Eastern Council ka la ïasnoh kti lang bad ka ICCR na ka bynta kane ka tamasa bah ha Ri Nepal. U Lamkynto ka kam Pathai Khubor (DIPR- NEC) u Mr M R Mahapatra u la kynthoh ‘Ki lum jong ka Thaiñ Shatei Lammihngi ka Ri India ki sa byrshem bad ki lumbah ka Nepal ha kane ka Tamasa Bah. La plie ïa ka Tamasa ha ka 14tarik Kyllalyngkot, 2017 ha Siddharta Art Gallery, Kathmandu da U Mr Jiwan Bahadur Shahi, Myntri ka kam Lariti, jong ka sorkar Nepal ha ka jingïadon ryngkat u Ambassador of India, u Mr Ranjit Rae bad kiwei kiwei ki kynrem lyndan na India bad Nepal. Ϊa ka Pyninam Thohdur ba la jer ‘North East India: Mosaic of Arts and Cultures’ la khreh pdiang sngewbha da Indian Cultural Centre, Embassy of India, Kathmandu bad u Bah Raphael Warjri na Riti Academy of Visual Arts uba lah don mynta ha Kathmandu un long u damdar ban pyninam ïa ki lariti jong ka Thaiñ Shatei Lammihngi ka Ri India.
