Shillong, Jymmang 17: Ka seng ssamla pule jong ka ki dong shatei lam mih ngi jong ka Ri India hapoh ka lama jong ka “North East Students’ Organisation (NESO),” kaba kyntup ia ka Khasi Students’ Union (KSU), ka All Assam Students’ Union (AASU), ka Naga Students’ Federation (NSF), ka Mizo Zirlai Pawl (MZP), ka Twipra Students’ Federation (TSF), ka All Manipur Students’ Union (AMSU), ka Garo Students’ Union (GSU) bad ka All Arunachal Pradesh Students’ Union (AAPSU) kila pynlong ia ka Executive Council Meeting (ECM) ha Guwahati ha ka 16 tarik mynta u bnai.
Ha kane ka jingialang kila ia kren bun ki kam kiba kum ka seng kila dawa na ka por sha ka por na ka sorkar pdeng ki dang sah teng mynta bad ki sorkar bapher bapher kiba kiba la wan ha ka Ri. Ka jingiakren kaba kongsan eh ha kane ka sngi ka long halor ka jingwan rung kyrthlep jong ki bar Ri. Nalor kiwei kiwei ki jingdawa ha kane ka jingialang la shim ia ka rai ba ia kane ka jingpynrung kyrteng ha Assam hapoh jong ka National Register Citizens (NRC dei ban pyntrei kam ruh ha baroh kiwei ki jylla jong kane ka dong shatei lam mih ngi jong ka Ri India da kaba shim ia u snem 1951 kum u snem ba thoh kyrteng khatduh bad u snem 1971 dei ban long u snem ot kyrteng.
Kine ki seng samla pule jong ka Dong shatei lam mih ngi jong ka Ri India ki kyntu ba ia ka Inner Line Permit dei ban pyntrei kam ha baroh ki jylla jong ka dong shatei lam mih ngi, ia ka ain Armed Forces Special Powers Act (AFSPA) 1958, dei ban pynkylla noh, kum ka seng ka daw ba dei ban don ia ka “Special Education Policy” ia kane ka thain da kaba pyntung hapoh ka riti synshar jong da Ri bad ban ai ka jingiada ha kaba ia dei bad ka jinglong trai halor ka khyndew ka shyiap bad ka jingdon ki marpoh khyndew.
Ka NESO ka dawa na ki sorkar jylla jong kane ka thain ba ki dei ban aid a ka jingmudui sha ka iing bisahr kaba ha khliehduh jong ka Ri ban pynthikna ba ka rai jong ka iing bishar kaba donburom kaba la mih dang shen ha kaba ia dei bad ka jingpynlong ia ka “All India Medical Entrance Test lane ka National Eligibility Entrance Test (NEET). kam dei ban ktah ia ki samla kane ka thain.
Haba ia dei bad kane ka NESO ka sa phah ia ka Memorandum sha u myntri rangbah duh jong ka Ri India bad sha ki Lat jong ki jylla bapher bapher kane ka thain ha ka 31 tarik mynta u bnai bad kin sa leit sha Delhi ban ia kynduh ia ki heh sorkar ha nongbah Delhi bad ia ki MP kane ka dong, kane ka long katkum ka kyrwoh kaba la phah da katei ka seng samla pule.
