Shillong, Lber 05: Ha dien saw sngi ba la khang ia ka iewduh mynta ka sngi la pynlait ia ka ia ka korphiew naduh ka por 6.00 baje mynstep haduh ka por 1.00 baje shiteng sngi mynta ka sngi da ki bor jong ka District Administration.
Ka jingpynlait ia ka koprhiew kala long ha pdeng ka jingpahara kaba khlain bha hapoh kane ka iew. Kiba pahara ki long na duh ki pulit jong ka jylla Meghalaya, ki pulit jong ka Hima Mylliem ki enforcement jong ka KHADC.
Saw dong jong ka iew la pyndon kam ia ki pulit Rapid Action Force kiba la wan poi sha kane ka nongbah Shillong kine kila iaid sawdong jong ka iew naduh ki thain Anjelee, sha Iew Mawlong, sha Motphran bad kum juh sha ki bynta jong ka Stand Jeep.
Ha kane ka sngi la iohi ba ki nongiew kila ia plie ia ki dukan jong ki bad ka jingia die ia thied kala iaid kum juh long man ka sngi, na ka liang jong ki paidbah ruh kila ia mih ban leit siew leit tda da ka jingjai jaia namar ka jingpynlait korphiew kaba hynniew kynta kala pynsuk ia ki paidbah ba leit ban siew ban tda.
