Shillong, Iaiong 18: U Bah Metbah Lyngdoh myntri ba dei peit ia ki kam jngohkai pyrthei jong ka jylla haba jubab ia ka jingkylli jong u Bah Syntar Klas Sunn ha kaba ia dei bad ka Crowborough Hotel ha Khyndailad, na ka liang jong u myntri u la ong ba katkum ka rai jong u nongbishar B K Sharma ka long ba u Bah Leseley Shylla u dei ban pyndep noh ia ka jingtrei hapoh 3 bnai.
Na ka liang jong u myntri u la ong ba un shimkhia hi da lade ban peit ba kane ka jingtrei kan dep noh. Haba ia dei bad ka pisa kaba la pynsah da u tei u nongshimwai na ka liang jong u myntri u la iathuh ba haduh mynta ka long T.1.5 klur tyngka ba u dang dei ban siew. U myntri u la ong ba ia kane ka Hotel la sdang ban shna ha u snem 1987 bad kala iaid mynta lakumba 31 snem.
La iathuh ba kane ka iing ba khyndai mala, ia ka mala kaba nyngkong bad kaba ar la shan da ka M/s SA Builders bad ia ka mala kaba lai haduh khyndai la shna da ka M/s Astra Construction Pvt Ltd bad mynta kala poi sha kakti jong u Bah Leseley Shylla ban pyndep ia kane jingtrei.
U Bah Lambor Malngniang u la kylli ha kata ka dei ka jingshisha ba ka sorkar kala mang pisa T.45 klur bad la siew ia kane ka pisa ha u snem 2017. Halor kane ka jingkylli na ka liang jong u myntri u la ong ba un dang hap ban wad jingtip.
