Shillong, Lber 29: Katkum ka mang tyngka jong ka Khasi Hills Autonomous District Council 2019-2020 kala pynishai ba ka tulop ha ka kyrdan stenographer ka long T.42,100/- mar ia sdang rung ha ka kam, katba ka Tulop jong u CEM ka dei tang T.39,900/- tyngka.
Ha kane ka mang tyngka kala pyni ruh ba ka tulop jong ki MDC ka KHADC ka long tang T.33,250/- tyngka katba ka tulop ki nongtrei ha ka kyrdan Upper Division Assistant ka long T. 35,100/- tyngka mar ia sdang rung ha ka kam.
Ka mang tyngka jaka pynishai ruh ba kiba ioh ia ka baowai iing hapoh jong ka KHADC, U CEM u ioh T.5000/- tyngka shibnai, u Deputy CEM, u Chairman bad u Nongialam ka liang pyrshah ki ioh T.4500/- tyngka shibnai, katba ki Executive Member bad u Deputy Chairman ki ioh T.3500/- tyngka shibnai. Katba ki MDC kim ioh ia ka bai wai iing.
Haba u SP News Agency u la ioh ban ia kren bad ki MDC, khlem da kwah ban pynpaw ia ka kyrteng, kila pynsngew ba ka long kaei kaei kaba ym lah ban long ba u khlieh jong ka Council yn rit ka tulop bad kin heh ki ophisar ka long kaba sngew lehrain ban iohi ba heh ka tulop u Stenographer ba dang shu wan rung ha ka kam ia u CEM.
Haba ia dei bad kane kane ka EC kaba mynta kala hap ban pyrkhat ban kyntiew ia ka tulop jong u CEM, Deputy CEM, Chairman, Deputy Chairman, ia ki EM bad kum juh ia ki MDC, lada ka JHADC ka lah ban leh ka KHADC ruh ka dei ban leh, ka long kaba phylla ba kan heh ka tulop jong ki nongtrei ia ki dkhot ka Executive Committee.
