Jowai, Jymmang 29: Ka Jaintia Youth Federation (JYF), hapoh ka jingialam u President jong ka u bah Poipynhun ki la hiar ia kynduh ia u SP ka East Jaintia Hills ma S. Thamar ban ioh tohkit bniah na u ha kaba ia dei bad ka jingkynnoh shoh pynmynsaw bad lute pisa u Batskhem Pala haduh Rs.4500/- na uwei u nongiarap niah truck uba kyrteng Eyoudicious Dkhar ba 34 snem, jong kawei ka kali ba don ia u No NL01 G 5115 ha Lad Rymbai, Ladmoolamonoh, East Jaintia Hills.
Ha kane ka jingiakynduh bad utei u heh pulit ka District, u la iathuh ha ki nongialam ka JYF ba hadien ka jingsaphriang ka Video ba shah shoh uwei u samla ha ka kynhun kiba na Khliehriat, na ka liang ki Pulit ki la register mukotduma ia baroh kito kiba donkti.
Utei u SP ka EJH u la iathuh ruh ba na ka liang ki pulit ki la wad ruh ia u kylleng ki Hospital bad tohkit ruh na ki shnong bapher bapher ban ai jingiarap ia utei uba la shah shoh katkum ka Video.
“Ngi la wad ia u sha ki Hospital khamtam ha NEIGRIMS hadien ba la ioh khubor ba udon ha katei ka jaka ai sumar, hynrei ngim shym la lap ia u”, la ong u SP.
Katba ki pulit ki dang wad ia utei u ba shah shoh bad kumjuh ia kito kiba donkti ban shoh ia u, ki la don ki riew paidbah kiba la wanrah pynban ia u sha Thanad hadien ba ki la ioh bat ia u ba u la donkti ban shoh pynmynsaw ia u Eyoudicious Dkhar uba dei u nongiarap niah truk ha kaba utei u Batskhem ruh u dei u nongbud jong katei ka trok hi.
U bah Thamar u la iathuh ba katkum ka jingujor, la iathuh ba utei u Batskhem Pala u la ia kynduh ia u driver jong katei ka trok ha ka 15 tarik ha Star Cement katba dang pynhap dewoing, bad da ka jingkyrpad ia utei u driver ban ai kam ia u bad namar ba u la ud da ka jingisynei u driver u la shah ia u ban trei kum u nongbud.
Shuh shuh u la iathuh ba ha ka miet sngi Saitjain, 25 tarik une u bnai, u driver katei ka trok u la pynieng ia ka trok ha Moolamanoh Junction bad ia lade u la leit noh sha shnong jong u sha Musniang bad la phah peit ia katei ka trok ha utei u nongiarap niah (spare driver) bad ha utei u nongbud, u Batskhem. La iathuh ba kitei ki arngut ki ia shetja bad ia dih kyiad ha katei ka jaka ha kaba ka la mih ka jingiakhajia hapdeng jong ki bad u Batskhem u la shim da u nar ban shoh pynmynsaw ia utei u nongniah trok.
Katkum ka FIR, utei u Nongniah trok u la iapler bad u Batskhem pat u la phet hynrei ki la don ki riew paidbah kiba iohi ia kane ki la beh bad iohbat ia u ha kaba ki la leit aiti ia u sha ki pulit bad mynta u la don hapoh ka judicial custody jong ki pulit ha Jowai District Jail. U SP u la iathuh ruh ba la kynnoh ruh ba utei u Batskhem u la shimruh ia ka pisa 4500/- kaba la ai da u driver na ka bynta ban theh umphniang ia katei ka trok.
Na ka liang u SP u la pynshai ruh ha ki nongialam ka JYF ba utei u Batskhem u don bun tylli ki kyrteng. Ha Umkiang la ju tip ia u kum u Forpunet bad u la jah na katei ka shnong la ar snem mynta hadien ba u la iehnoh ia ka lok jong u. La tip kyrteng ruh ia u kum u Fridi bad Friday. Um dei ruh u khunswet, hynrei u dang don ka kmie bad ki hynmen bad para. Udei uba na ka shnong Rupasara, Barak Valley, Assam. U dei uba la 20 snem ka rta bad ki pulit ki la ioh ruh ia ka Baptismal Certificate na ka kmie jong u kaba la ioh ha ka por ba pynbaptis ia u ha ka Balang Presbyterian, Rupasara. Katkum katei ka Certificate ka sngi kha jong u ka long 13-4-1997.
Na ka liang ka JYF ka la kyntu ia u SP ban shimkhia halor baroh ar tylli kitei ki jingjia, ka jingshah shoh u Batskhem da kaba kem ia kiba donkti bad kumjuh ban pynshitom ia utei u Batskhem katkum ki kyndon ain.
Na ka liang u SP ruh u la kular ia ka JYF ban shimkhia da kaba ong ba, “Ka ain kan nym map iano iano, la u rit ne u khraw, lane uba riewspah ne uba duk kin shah pynshitom katkum ki kam be-ain ba ki la leh.
Shuh shuh na ka liang ka JYF ka la kyntu ia kito kiba donkti ban shoh ia u Batskhem Pala ruh ban wan pyndem noh hakhmat ki pulit kumba la wan pyndem kito ki arngut.
