Nongpoh, Nailar 08: Ka Khasi Students’ Union (KSU), 20 Mer Circlehapoh ka jingialam u Samla Jaian Sylliang, president jong ka, ki la pynlong ia ka jingjurip ia ki lai tylli ki top um jong ka tnat PHE kiba la shu pynieng sah khlem pyntreikam ei ei shuh kiba don ha 19 Mer.
Kitei ki lai tylli ki top um kim shym la lah shuh ban treikam na ka daw jong ka jingshah rat ki pipe um kiba dei ban pynpoi um sha ki paidbah, la ong u Samla Jaian.
Kum u nongialam ka KSU, u Samla Jaian u la iathuh ruh ba kitei ki top um mynta la bun snem naduh ba la wan trei ka NHAI ban shna pynheh ia ka surok bah, ki la sah khongreng khlem lah shuh ban ai jingshakri sha ki paidbah nongshong shnong kiba donkam ban ioh ia ka umbam umdih kaba khuid.
U la ong ruh ba kitei ki top um ki dei na ka skhim umbam umdih naduh ki snem 2007 bad kaba dei jong ka Water Supply Scheme ha ka jingmang kaba T.11.06 lak, hynrei kaba la pynsyrwa kai ia katei ka tyngka sorkar lada kam don satia kano kano ka jingmoramot na ka liang ka PHE bad kaba long ruh ka jingjynjar um ia ki paidbah
nongshong shnong.
U la kynthoh ruh ba bun na ki ïing ha katei ka shnong ki hap ban thied um ha ka dor kaba rem bha, haduh T.2500 shibnai kaba tang ka umsait umkhlieng ki hap thied T.2000 bad ka umdih kaba T.500 bad ba katei ka jingthied um ka long ba ki hap ban tan hi na ki
tyllong um jong kito ki trai jaka kiba don ryngkat bad ki tyllong um
kiba biang.
Kumta ha kaba iadei bad kane, na ka liang ka KSU kakyrpad ia katei ka tnat sorkar ba ka dei ban leit jurip bad ban bteng biang ia ka jingshakri jong ka da kaba kan pynpoi um biang ha kitei ki
top ba la thylli khnang ba kan iarap ia ki nongshong shnong ban ioh ia
ka umdih umbam kaba khuid.
U bah Jaian u la ong ruh ba kum ka seng kan iai buddien ia kane bad lada ka PHE kam lah ban leh ei ei, na ka liang ka KSU ruh kam banse ban shim da kiwei ki lad ki lynti ba tyngeh.(SP News)
