Shillong, Lber 30: U Chief Executive Member (CEM) jong ka Garo Hills Autonomous District Council (GHADC) u Denang T Sangma, mynta ka sngi u la hiar shuki noh khlem da iatynjuh bor hapoh ka iing dorbar ha dei ba ka iing dorbar kala pdiang ia ka mang tyngka kaba saw bnai, kaban sdang naduh 01.4.2017 bad kan kut ha ka 31.7.2017
U Chairman jong ka GHADC, u Boston Marak, haba kren ha u SP News Agency , lyngba ka phone u la iathuh ba ha dien ba ka iing dorbar kala dep ban pdiang ia ka mang tyngka ba saw bnai, kala dei ban ia kren sa ia ka motion bym don jingshaniah shuh ia u CEM, hynrei na ka liang jong u CEM u la phah ia ka shithi hiar shuki jong u khlem da ia tynjuh bor hapoh ka iing dorbar.
U Chairman u la ong ba katkum ka AD rules, u la pyntip ia kane ka jingkylla ka sain pyrthei ha GHADC sha u Deputy Commissioner jong ka West Garo Hills District bad na ka liang jong u yn sa pyntip sha u Lat jong ka jylla. Ha ka juh ka por la ong ba katkum ki sub rule, bad katkum ka Ad Rule 20,21, bad 22, U lat ka jylla un hap ban khot ia ka iing dorbar ban jied ia u CEM ba thymmai.
Ha ka juh ka por na ka liang jong u Chairman u la ong ba kat kum ka sub rule ka shah ia u Lat jong ka jylla ban thung ia u CEM ba shipor bad ar ngut ki Executive members ban pyniaid ia ka ophis haduh ba ka iing dorbar kan ioh ban jied ia u CEM ba thymmai jong ka iing dorbar.
Ka jingdon jong ki MDC hapoh jong ka GHADC kumba ki jop ha ka election MDC, na ki party bapher bapher ki long, ka NPP ka don 10, Congress 7, BJP 1, GNC 3, NCP 1, bad ki Independent 5.
