Shillong, Jylliew 21: U Bah Donkupar Sumer Executive Member MDC jong ka seng UDP mynta ka sngi u la phah ia ka shithi hiar shuki sha u CEM jong ka KHADC ha dien ar sngi ba ka UDP kala weng noh ia ka jingkyrshan na ka jingiatreilang bad ka PDF hapoh jong ka KHADC.
Haba kren ha u SP News Agency u Bah PN Syiem mynta ka meit u la iathuh ba u Bah Donkupar Sumer u ba dei u EM hapoh jong ka Executive Committee u la phah ia ka shithi mynta ka sngi ba u la resign noh kum u EM, na ka liang jong u CEM u la iathuh ia kane ka shithi hiar shuki u la ioh pdiang mynta ka sngi.
Ha dien ba ka UDP bad ka HSPDP kala weng noh na ka jingiatreilang bad ka PDF hapoh jong ka KHADC ha ka 19 tarik, na ka liang jong u Bah Donkupar Sumer MDC jong ka UDP ha ka 20 tarik ka sngi sdang jong ka dorbar mang tyngka hapoh jong ka KHADC u la shong ha ka liang pyrshah.
Ha ka jingiashong dorbar kaba mynta ka sngi kaba dei ka sngi kaba ar jong ka jingshong dorbar mang tyngka u tei u MDC jong ka UDP u shong ha ka liang pyrshah wat la ym pat hiar na ka shuki EM. Dei ha dien ba la wai ka jingiashong dorbar mynta ka sngi u sa phah ia ka shithi ienoh kam kum u EM mynta ka sngi.
