New Delhi, May 16: ka Secretary kaba dei bad u president jong ka Ri India ka Omita Paul, mynta ka sngi kala plie ia ka jingai jinghikai ri ngap hapoh Rashtrapati Bhavan ha iing sah jong u president jong ka Ri India.
Haba kren ha kane ka jingai jinghikai ri ngap, ka secretary jong u president jong ka Ri India kala ong ba na ka liang jong ka Rashtrapati Bhavan kala shim bun ki lad ki lynti ha kaba ia dei bad ka kam thung ia ki soh ki pai ha kine ki san snem kiba la leit noh bad kum juh ha ki kam thung syntiew.
Haba phai biang sha kane ka kam ri ngap kala ong ba kane ka ngap kaban pynmih na kane ka jaka sah jong u president jong ka Ri kan long kaba kham kyrpang namar ka jingdon bun ki syntiew ki skut, ha dien jong kane ka jinghikai na ka liang jong ka KVIC kan buh san spah tylli ki synduk ri ngap hapoh jong katei ka jaka sah jong u president jong ka Ri.
U Chairman jong ka KVIC u V.K Saxena u la ong ba kane ka jinghikai ka long kaba don kam namar ka jingri ngap ka long kaba kongsan bad la leh ia kane ka dei kat kum ka jingangnud jong u myntri rangbah duh jong ka Ri u Narendra Modi ia kaba la jer kyrteng ‘Sweet Revolution’.
U OSD ba dei peit ia ka kam thung soh hapoh jong ka , Rashtrapati Bhavan, uU. D. Kukreti u la ong ba kane ka jinghikai ban ri ngap kan long na ka bynta san snem, kine kiban shah hikai kin long ki nongpynkhuid kper, kiba thung syntiew bad ki kynthei kiba don ha ka kynthun trei mon sngewbha kiba trei hapoh iing sah jong u president ka Ri India.
