Shillong, Lber 14: U Myntri Rangbah ka jylla u Conrad K Sangma haba jubab ia ka jingkylli bah Process T Sawkmie haba ia dei bad ka jingpyntrei kam ia ka ILP ha ka jylla, la ong ba ia kane ka jingdawa dang peit bniah hapoh ka tnad kam poh iing sorkar pdeng.
Haba jubab ia ka jingkylli bynrap, u myntri rangbah la ong ba ka sorkar pdeng kala thoh shithi la ar sien bad la ai ruh ia ka dorkhas haba u myntri kam poh iing u wan sha Shillong ban pynkynmaw ia kane ka jingdawa ia ka ILP ha kane ka jylla.
U Myntri rangbah la ong ba ia mynta kam don da kawei kawei ka jingpyrkhat, ka thong jong ka sorkar ka long ban ia kren bad ka sorkar pdeng kumba la pdiang da ka iing dorbar ia ka rai ban dawa ia ka ILP ha kane jylla.
Haba ia dei bad kane ka jingdawa ILP na ka liang jong u bah Process T Sawkmie u la ai jingmut sha ka sorkar jylla ba dei ban ialam lang baroh 60 ngut ki MLA ban ia kynduh ia u myntri rangbahduh ka Ri India lane ia u mytnri kam poh iing ka sorkar pdeng ban ong ba ka jylla Meghalaya ka don kam ia ka ILP.
