Shillong, Lber 18: U Bah Vincent H Pala kyrtong MP jong ka seng Congress na ka 1-Shillong Parliamentary Constituency mynta ka sngi u la pan biang ia ka jingkyrshan na ki paidbah ha kane ka ileshon MP ka ban long ha ka 11 tarik jong u bnai Iaiong 2019.
Haba kren ha ki nongthoh khubor mynta ka sngi ha Shillong Press Club ha kaba ki nongialam ka seng Congress naduh u president ka MPCC u Dr Celestine Lyngdoh, u Working President u Bah James Lyngdoh bad kiwei ki nongkit kam kila ia don lang, u Bah Vincent H Pala, u la kynnoh ba ia ka party UDP bad ka NPP kiba don ha ka sorkar mynta la pyniaid da ka BJP.
U la ong ba ha kine ki shiphew snem ba u la ong u MP, u sngewthuh bay m shym la lah ban leh ia kaei kaba ki paidbah ki angnud hynrei u la hun ia kaei kaba u la lah ban leh na ka bynta ka jaka kaba u mih khmat, u la kam ba la leh bun ki kam kum u MP bad kawei na kita u la ong ba jaka ai jinghikai ban ia khun ia ka IAS eksam ha Shillong.
Haba ia dei bad ka lynti rel u la ong ba u la lah ban pynioh ia ka jingman g pisa haduh T.4000 klur tyngka, hynrei bun kiba pyrshah ia ka, ia kane ka bynta ka shong ha ka jingstad jong ka sorkar jylla kumno ban leh, u la pyndep iala ka jong ka kamram ha kaba ia dei bad ka lynti rel.
Haba jubab ia ki jinglylli ha kaba ia dei bad u pud u sam bad ka jylla Assam kaba ym pat lah ban pynbeit haduh mynta, na ka liang jong u kyrtong MP jong ka seng Congress u la ong ba kane ka long ka kam kaba eh, hynrei u la thoh shithi sha ka sorkar pdeng ba dei ban thung ia ka “Boundary Commission” ban pynbeit ia kane.
