Shillong, Iaiong 10: Ka Tea Board jong ka sorkar pdeng kala pynlong ia ka jingialang ha Nongbah Shillong ban ia kren ia ka jingdon kam jong ki nongrep sla sha kiba rit kiba dei ha kane ka jylla Meghalaya, ba kumno ban pynmih ia u sla sha ba khlem pyndon kam dawai ha kane ka jylla.
Ha kane ka jingialang na ka liang jong ki nongrep sla sha na kane ka jylla Meghalaya, kham tam eh na ki lai tylli ki seng nongrep sla sha ka Ribhoi Tea Growers’ Association, The Mawlyngot Tea Growers’ Society and the West Garo Hills Tea Farmers Federation bad kila don ruh na kiwei ki jylla kiba la wan ban ia shim bynta.
Ha kane ka jingialang la pynsngew ba, na ka bynta ban kyntiew ia ka rep sla sha ha ki jaka lum ka sorkar kala dei ban ai jingiarap haduh 75 percent na ka bynta kaba thung ia u sla sha bad kane ka jingiarap kan long ruh na ka bynta kito ki karkhana kiba pynmih pat ia u sla sha na ka bynta ban pynioh ia u sla sha u ba bha.
Na ka liang jong ka Tea Board jong ka sorkar pdeng la wan mih khmat da u S. Hazra, Deputy Director jong ki nongrep sla sha kiba rit naka ophis kaba don ha Dibrugarh, u DM Kakati, u Assistant Director, Tea Development Guwahati, bad ka Silchina G. Momin Development Officer, Sub Regiopnal Tea Board ophis kaba don ha , Umsning. Bad ki kdhot jong ki lai tylli ki seng ba pynmih sla sha na ka jylla, ka Ribhoi Tea Growers’ Association, The Mawlyngot Tea Growers’ Society and the West Garo Hills Tea Farmers Federation.
Ha kane ka jingiamir jingmut kaba shisngi ka jingiakren hi ka long halor ka phang ban ialeh katba lah ban pynmih ia u sla sha u ba khlem khleh dawai ei ei ruh em bad u K.W. Chyne, secretary jong ka Federation u la ai ka jingiaroh ia kane ka sien jam kaba la shim da ka Confederation of Indian Small Tea Growers Associations (CISTA) ban khot ia kum kane ka jingialang. Ha kane ka sngi kila don ruh kiwei kiwei ki stad kiba la batai ha kaba ia dei bad kane ka rep sla sha.
