Jowai, Naiwieng 29: ka Jaintia Students’ Union (JSU) kum shi bynta ban buddien iaka jingpyntreikam iaka Community College hapoh ka shnong Wahiajer ia kaba la tip baroh shi katto kum ka NEHU Compus haka 25 tarik mynta u bnai kala ia kynduh ia u prof. H Lamin u ba long ruh kum u Pro VC ka Skulbah NEHU bad ha kajuh ka por u ba long ruh u Chairman jong ka Task Force Committee, ka Cmmittee kaban peit bniah iaka jingiaid beit kane ka Community college ha Wahiajer west Jaintia Hills.
Ha kane ka sngi ka JSU kala pynkup burom ruh ia u Pro. H. Lamin halor ka jingioh ka jongu ban bat iaka kyrdan Pro.VC hapoh kane ka skulbah kumba la katto katne por. ka khubor naka JSU ka pynpaw iaka jingiaroh bad sngew burom ia une u rangbah uba la ioh ia kane ka kyrdan kaba dei ka jingsarong iaka ri bad ka Jaitbynriew hi baroh kawei.
Haka jingia kren bad u Pro. VC ha kane ka sngi hapoh ka kamra treikam jongu ha kaba iadei bad ka Community College ha Wahiajer, na ka liang jongu u la kular ban shimkhia bha kumba la pynkit ha u iaka bor kum u Chairman ban peit naka bynta ka jingiaidsted ki kam ha kaban tei ia kane ka College.
shuh shuh na ka liang jongu u la ong ba ka Committee (Task Force Committee) ka la dep ban leit peit iaka jaka naka bynta ban sdang noh ia kane ka jaka pule, ha kaba u la ong ruh ban shen yn sdang noh iaki katto katne tylli ki tnad pule kumka Bamboo technology, Pathology bad kiwei kiwei, da kaba pyndonkam iaka Community Hall jongka Shnong Wahiajer bad kumjuh ia ki katto katne ki Ing jongka Animal & Husbandry kaba don ha kane ka jaka, bad ka jingpynkhreh na ka bynta kane ka dang iaid shit shait.
U Pro. VC u la ong ruh ba ia ka jingsdang ban shna ia ki building naka bynta kane ka College haka jaka kaba la ai sngewbha daka shnong Wahiajer kaba heh haduh 6 hec tam yn sa ia pyrkhat sani bha hapoh ka Committee, bad yn pyrshang ban pynkloi kat balah.
ka JSU ka buh iaka jingkyrpad ia u Pro. VC ka NEHU bad u ba dei ruh u Chairman jong ka task force commiittee bad kumjuh iaka committee hi baroh kawei ban shimkhia ban khnang ba kan don ka jingmyntoi iaka thain jaintia hi baroh Kawei.
