Shillong, Risaw 09: U Lat jong ka jylla u Phagu Chauhan ha ka jingleit jong u sha Delhi, mynta ka sngi u la ia kynduh ia u myntri rangbah duh jong ka Ri India u Narendra Modi ha ophis jongtrei jong u.
U Lat jong ka jylla u la don sha Delhi la katto katne sngi mynta, wat la ha ka jingpynlait khubor kam shym la kren ia ka jingiakren hapdeng u lat ka jylla bad u myntri rangbah duh jong ka Ri India hynrei la sngewthuh ba kila ia kren ha kaba ia dei bad ka jylla ha ki ba bun ki liang.
Kane ka jingiakynduh jong u Lat ka jylla ia u myntri rangbah duh jong ka Ri India ka long kaba don kam namar ha kum kine ki jingiakynduh wat ka long tang ka jingleit ban ia kynduh kum ka jingburom hynrei ki juh ia kren ha kaba ia dei bad ka roi ka par bad ka jinglong jingman ha ka jylla.
