Shillong, Kyllalyngkot 28: ka skul bah ICFAI jong ka jylla Meghalaya mynta ka sngi kala pynlong ia ka District Youth Parliament (DYP) 2019, hapoh ka skhim “National Youth Parliament 2019” kaba dei lyngba ka tnad ialehkai jong ka sorkar pdeng.
Ia kane ka DYP 2019, la pyniaid da ka shnat NSS jong kane ka skul bah bad la shah ia ki samla ban ia shim bynta ha kane ka DYP tang ia ki samla kiba hapdeng ka rta 18 haduh 25 snem ha kaba ki lah ban pynsngew ia ka jingsngew ka jong ki.
Ka phang kaba la ia kren ha kane ka sngi, ka long halor ki kam lehnoh ha ka pyrthei, ka Ri India kala buh ia u mawmer ha kaba ia dei bad kiba pynkhien ia ka jingsiew khajana, ka Ri India kala maiphang halor ka jingkylla ka mariang, ka India ka dei ka jaka ban kyntiew ia ki nongialehkai, kane ka dei ka por ia ki nongialehkai ka Ri India ba kin pynsah nam.
Ia kane ka DYP 2019 la plie da ka Dr. (Ms) A. Gatpoh, VC jong ka ICFAI University Meghalaya, ha ka jingiadon lang u Dr. B.D. Cajee State NSS ophisar bad ka Dr. (Mrs) I.B. Bhuyan Registrar, kala kren pdiangburom ia baroh kiba la wan ban ia shim bynta.
Ki nongbishar ha kane ka sngi ki long u Bah Richard Kahit, khlieh jong ka Panchayat, Prof. L. S. Gassah, ophisar ba la shong thait, u bah Bobby Wahlang, ba trei mon sngewbha, Dr. Lakhon Kma, nongthoh kot, ka Dr. Mebada L. Nongbri, nonghikai.
Baroh kiba la wan ban ia shim bynta ha kane ka DYP 2019 na East Khasi Hills District ki long 42 ngut bad lai ngut na ki la shah jied ban ia shim bynta ha ka “State Level” kaban long ha NEHU ha ka 7th Rymphang 2019.
Ha kane ka jingiatyrko kaba la long mynta ka sngi hapoh jong ka DYP 2019, kiba la shah jied ban mih khmat ia ka District sha ka “State Level” ki long , ka smala Yarisa Wahlang Kharbuli kaba la wan ba nyngkong, u samla Erenbeni Humtsoe bala wan ba ar bad ka Samprit Shah kaba la wan b alai ha kane ka DYP 2019.
