Jowai, Naitung 13: Ka Lehniam shad Behdeinkhlam ka Sein Raij Jowai kaba ju long manla u snem, mynta u snem ruh ia kane ka lehniam kaba kongsan bad kaba iphuh iphieng jong ki Pnar kiba dang bat ia ka niam tynrai ka Niamtre ha Jowai kaba la sdang naduh kane ka 11 bad kut mynta ka sngi ka 13 tarik da kaba leit buh ia ki Rod sha Aitnar, hapdeng ka jingshongshit shongkun shong Blei ryngkat ka jingiphuh iphieng kaba khraw.
Mynta ka sngi la wan ban sakhi ia kane ka lehniam Behdeinkhlam da ki phew hajar ki paidbah na kylleng ka bri u Hynniewtrep Hynniewskum kumjuh ruh kiba na bar jylla bad kiba na ki ri nongwei. Ki khun ka Niamtre ha ryngkat ki bom ki ksing bad ki Tangburi ki kynoi ki risa ha ka jingkmen ban wanrah ia ki Rot sha Aitnar- ka pung kyntang ban pyni paidbah ha shwa ban bret ia ki ha katei ka jaka.
U Lat ka jylla u V. Shanmuganathan uba long u kongsan, u Chief Justice ka Meghalaya High Court ki la shah khot sngewbha ha ryngkat ki Myntri sorkar jylla kynthup ia u bah Sniawbhalang Dhar Myntri ka tnat PWD, ma Ngaitlang Dhar Kong Roshan Warjri Home Ministre, bah HDR Lyngdoh Law, DC ka West Jaintia Hills u Arun Kumar Khembhavi, u SP ka West Jaintia Hills u M. Muthu, ma Thombor Shiwat CEM JHADC, u President ka Sein Raij Jowai ma O.R. Challam, ki MLA, ki MDC, bad kiwei kiwei ki heh bad ki sahep sorkar ki la wan ban sakhi ia kane ka lehniam ba paw ka ri lum Jaintia.
Ka lehniam Behdeinkhlam hynne ka sngi ka la sdang da ka lehniam kyntin Khnong ha iing sah ka Langdoh bud pat sa ka Bam Tyngkong kaba la pyndep da ki rangbah niam kiba kynthup ia u Dolloi kum u Khliehka niam ha ryngkat ka kynhun jong u kiba kynthup ia Pator, u Sangot bad u Maji.
Hadien kane ki Wasan ki leit rung ha man la ki thliew iing ban pyndep ia ka lehniam ‘ Shoh Thyndai’ da kaba shoh bad sympat ia man ki tnum iing da ki Deinkhlam ban beh ia ki ksuid ki khrei, ia ka pang ka shitom bad ia kaba sniew baroh na ki iing ki sem. Ki Wasan ki da nguh da dem ha ryngkat i pyrnah i pyrjin ba u Tre Ki- rot un kyrkhu kyrdoh ia ka iing ka sem ha baroh ki liang naduh ka trei ka ktah bad ka koit ka khiah.
Ka bynta ba kongsan tam ka Lehniam ka la sdang ha ka nohphai sngi ha Aitnar- ka pung ba kyntang, ha kane kajaka ka Behdeinkhlam ka la sdang da ka jingwan ki Wasan hapoh ka jingialam u Pator ban pynlong ia ka nguh ka dem ia ka Syiem Aitnar bud pat sha ka jingwanpoi ka Symbud Khnong Blai. Hadien ka jingwan poi ka Symbud Khnong Blai, ki khon ka Niamtre ki la hiar ban shad ha katei ka pung ktieh ba kyntang.
Ki dong bapher bapher kynthup ia ka Panaliar, Dulong, Chilliangraij, Loomiongkjam, Loomkyrwiang, Iongpiah nalor ka , Sein Ummulong bad ka Sein Tylli Niamtre Ladthadlaboh ki la wanrah ia ki rot jong ki ha ki dur ha ryngkat ka khubor sha ki paidbah. Mynta u snem don haduh 12 tylli ki Rot kiba la wanrah mynta u snem sha Aitnar, hadien ba la wan poi lut ki Rot la wan hiar ka Khnong Blai bad ka jingbret noh ia ki rot baroh.
