Shillong, Lber 23: ka la don ka jingiakynduh bad ki longheh ka Australia kiba kynthup ia u Mr. Jack Taylor, Second Secretary (Political), Australian High Commission, na Delhi, u Mr. Daniel Sim, Deputy Consul General, na Kolkata, ha ka office Impulse NGO Network, headquarters, ha Shillong ha ka 22 tarik March 2021.
Ha katei ka jingiasyllok ka jingiakynduh u Chairman, Ka Grand Council of Chiefs of Meghalaya bad Adviser-Spokesperson, Federation of Khasi States, U bah John F Kharshiing, u la iathuh lyngkot ha kitei ki rangbah nabar ri ia ka jingiaid lynti ka jingiakhun palat 70 snem jong ki jingsynshar tynrai.
Ha kane ka jingiakynduh u la ai ha ki ia ka copy jong ki sla kiba la sei na parliament India shaphang ki dulir bad ki kyndon ia soh Ri India ki Dulir jingiateh bad ki jingkular (conditional Instrument of Accession and Annexed Agreement of 17 August 1948) kiba la pdiang bad soi da u Shri. C Rajagopalachari, Governor General ka Ri India.
Ka Sorkar pdeng jong ka Ri India bad ki arphewsan Khasi States kumjuh ruh la ia soi lang kum ka Federation of Khasi States bad ia kitei ki dulir la wanrah bad buh hakhmat ka dorbar parliament lyngba ka White Paper on Indian States da u Deputy Prime Minister Sardar Vallabhai Patel ha u snem 1949-1950, uba la wanrah hakhmat ka dorbar parliament ia ki jingiateh bad ki jingkular (IOA & AA treaty agreements) jong baroh ki Princely States.
La pynsngew ha kitei ki longheh na Australia ba kumba long mynta ka don ka jingdkoh kaba jur kaba ngi ong “constitutional Anomaly” hapoh ka Constitution Ri India namar ia kitei ki jingiateh da ki kyndon jong ki Hima Khasi States ym shym la pynpaw lane pynrung lane pyndep kat haduh kine ki sngi.
Kumta kum ka jaidbynriew khasi kiba rit paid ngi ia kynduh ki jingeh kiba bun namar ngi ia tyngkhuh man ka por man ka sngi bad kiba bun tylli ki Ain kiba mih na ki bor sorkar India ha ka synshar khadar bad ka bishar (legislative, Executive and Judicial).
ha kaba ia tyngkhuh ki Riti Dustur bad kiba bun ki ain(central legislation) na Ri India bad kitei ki jingiatyngkhuh ki mih lada wad ia ka thymmei ki long namar sah teng ban pyndep ia ki jingiateh bad ki jingkular (Instrument of Accession and Annexed Agreement) (non -fulfillment of the national solemn commitments)
Nalor katei ka kam haneng ha katei ka jingiasyllok la ia kren halor kiba bun ki mat kiba ktah ia kane ka thain bad ki Ri South Asia, ka jingkylla ka suin bneng ka mariang (climate change), ki lad kam pynroi sha ki thain kyndong, ka jingdonkam ban ioh ka synshar khadar kaba shai naduh tynrai.
Ki jingeh sha ki thain border, ka hok jingiada ia ki longkmie, ka hok ai lad pule puthi ia ki samla kynthei shynrang ha ki skul kiba bha, ki kam jngohkai, ki lad ia treilang ka Ri India bad Australia, ban thaw lad ban iatreilang ha ki kam kilan met bad ban ia kren halor ka Australian Rugby (football), ki lad pynlong ia ki jingialehkai tynrai (indigenous games) bad kiwei kiwei.
Kiwei ki nongialam jong ki kynhun treimon sngewbha kiba la shah khot sngewbha ha katei ka jingiasyllok ki la ai ia la ki jong ki jingpynshai halor ki lad ban ia treilang hapdeng ka India-Australian ha ki kam kiba ki ia trei ha kine ki thain lam mihngi. Ki longheh Consulate officials ki la don ruh ka jingiakynduh bad ki Katto katne ki longheh ka jylla Meghalaya.
