Shillong, Nailar 10: Ka Saw Shnong Divelopment Council (SSDC) Mawpud Area bad ka HNYF ka la pynlong ban jurip ia ki surok PWD naduh ki surok heh Ranikor sha Mawsynram bad Shillong, kata naduh jingkieng Umpung sha duh Area Mawpud South West Khasi Hills kaba don tang 13 Km ka jingjngai hynrei la hap ban iaid haduh 2 kynta tam da ka kali ban poi ha ki shnong ka thain Mawpud kaba don 4 tylli ki shnong kata Upar Mawpud, Lower Mawpud, Dom Mawlein, bad Pyndenwar.
Ki paidbah ka thain ki im da ka Rep ban ioh ka bam, phah skul khun bad lada wan ki jingeh ha ka pang ka shitom ki ju shaniah beit na ki jingmih na ka Rep ban pyndap ia ka iing bad kiwei kiwei jingdonkam, kitei 4tylli ki shnong ki im ka rep kwai, tympew, Soh Mrit, Synsar, Sohniamtra bad kiwei, hynrei lada ka surok ka sniew kumba ka long mymta kan pynduh jing kyrmen ia ki ban nang pynheh ia ka kamrep bad iabeh sha sor ban wat kam khamtam lei ki Samla ba la nang la stad yada ki dep pule na Mawkyrwat , Mawsynram bad na kiwei.
“Ka pyndiaw ne rit mynsiem noh bakin leit phai biang sha la shnong ban pynheh ia ka kam rep da ka jingnang jingtip haba ki la pyndep jingpule lada ka surok PWD ka long kumne”, ong u bah KS Rani Vice president HNYF Central Body hadien ka jingjurip ia katei ka surok ha shnong Mawpud ryngkat ki paitbah bad ki Myntri Shnong, ki Rangbah shnong ka thain Mawpud hapoh “Saw Shnong Divelopment Council” (SSDC ) hapoh ka jingialam u bah Dmanson Thongny Morbah kum u president bad Rangbah Shnong ka Pyndenwar, u Myntri shnong Mawpud bah Roling Stone Wanniang, ki secretary shnong bad kiwei ryngkat ka HNYF hapoh ka jingialam u bah KS Rani, Vice president HNYF Central Body ki dkhot HNYF Ranikor circle bad HNYF Border Area Circle, kila pynpaw ka jingsngew diaw halor ka jingieh bein ka sorkar bad ki nongmihkhmat iaka surok PWD ba la rim bha hapoh ka jylla ba la pyntrei naduh u snem 1971.
Kane surok ka hap hapoh ka jingpeit u Executive Engineer (EE) ka Ranikor Division, Superintendent Engineer (SE) West Khasi Hills. U bah Dmanson Thongny Morbah president ki Saw shnong Divelopment Council ula iathuh ba kane surok la shna naduh ka por sorkar Assam ha u snem 1971 bad mynta ka la dap 45 snem, hynrei ka sorkar bad ki nongmihkhmat kim shym la shimkhia ei ei ruh ia ka jingdonkam ki paitbah ka thain Mawpud.
U Secretary Mawpud u bah K.K Wanniang ula ong ha ka jingshisha ka la jan ban leit sha Mawkyrwat lyngba ka surok PMGSY ba la bteng na ka surok PWD sha shnong Bamon shaduh Mawkyrwat hynrei dang sahteng sa 2 km ban pyniasoh. Kumta ka SSDC ka kyntu ia ka sorkar lyngba u MLA ka thain, u Minister PWD ba kin shimkhia lem ban pynioh surok rong noh.
U bah KS Rani Vice president HNYF Central Body ula kynthoh jur ia u MLA ka thain ba um shym la shimkhia ban pynbha ne ai surok rong ia ki shnong kyndong bad ha jaka ban iarap u pynduh pynban wat ia kaba la khot Tender ban ai rong ia katei ka surok
U la kyntu ia ka sorkar ba shimkhia lem ia kane surok ban pynbha kaba ki paid ki iakynduh jingeh ha ka pang ba shitom ban leit shim dawai bad ka kit ka bah namar ba sniew palat ka surok bad kumjuh bam kit ia ki marrep mariang ban poi sha ki iew ki hat.
