Shillong, Naitung 19: Ka jingangnud khmih lynti ki paidbah nongshong ka thaiñ bad ki bor pyniaid ka Mawkynrew Public Heath Centre ba
n ïoh ia ka Ambulance ka la urlong ha ka taiew ba la dep hadien ba u nongmihkhmat ka thaiñ, Bah Banteidor Lyngdoh uba dei ruh u Myntri Sorkar Jylla, u la leit ban ati ia kane ka Ambulance ha kane ka jaka ai jingsumar.
“Kane ka Ambulance ka la long lyngba na ka Chief Minister’s Relief Fund (CMRF) bad kan long ka jingmyntoi kaba khraw ia ki nongshong shnong ka thaiñ ha ka por ka jingdonkam kyrkieh ha ka pang ka shitom bad ki jingjia ba sngewsih”, la ong u Bah Banteidor haba kren ha ka jingialang pyllait paidbah ia kane ka Ambulance.
Kiwei kiba la ia donlang ha kane ka sngi kynthup ia u Dr I Syiem, Dr in-charge Mawkynrew PHC, Dr EK Nongbri, u Sordar ka Shnong Mawkynrew, u Bah N Shylla, ki nongialam shnong, u President ka Synjuk ki Nongsynshar Shnong Mawkynrew, u Bah K Lyngdoh, Secretary, Bah Seibor Warbah, ki nongialam ka PDF ba kynthup ia u President u Bah A Rynjah, ki nongtrei ka PHC lem ryngkat kiwei pat.
Ki bor pyniaid kane ka jaka ai jingsumar ki la pynpaw ba da ka jingioh ia kane ka Ambulance ka la weng ia ki jingeh ban phah ia kiba donkam jingsumar kyrkieh sha ki jaka ai jingsumar kiba kham bha bad paka kum sha nongbah Shillong bad lane ha kaba kit ba bah ha ki jingjia ba sngewsih.
Ki nongshong shnong kynthup ki la pynpaw ka jingsngewkmen bad ai khublei ia u Bah Banteidor uba la shim khia bad uba na ka por sha ka por u iai don ryngkat bad peit ia kiba shitom bad jynjar. Ki la pynpaw ba kane ka Ambulance ka dei ka jingkyrkhu ia ki namar baroh shi katta ki shem jingeh haba don ba ia shitom ba pang bad ha ki kam sngewsih namar tang ban wad kali ruh lut por da ki phew kynta.
Ha shwa kane ka jingleit aiti ia ka ambulance, u Bah Banteidor u la lum ruh ia ki nongshong shnong kiba dei ki nongrep na ki san tylli ki shnong ha shnong Thangsning ha kaba u la noh synniang da ka jingïarap pisa sha ki. Kane ka jingai jingïarap ka dei ruh shi bynta ba ki nongshong shnong kiba dei ki nongrep ba kin lah ban kyntiew ia ka kam rep kam riang bad kam ri jingri.
Kiwei kiba la iadonlang ha kane ka jingialang ki kynthup ia u Sordar ka Shnong Thangsning, u Bah T Nongkhlaw, ki nongkitkam shnong, ki nongialam ka PDF ba kynthup ia u President, u Bah A Rynjah, u Nongaiktien ka Party, u Bah Seibor Warbah lem bad kiwei kiwei. Ki nongioh myntoi na kti u nongmihkhmat ki la don kumba 100 ngut eiei.
Haba kren ha kane ka jingialang u MLA u la ong ba kum u nongmihkhmat u kwah ba ka roi ka par bad ka jingkit khlieh na ka bynta kiba duk kiba shitom ka dei kaba kongsan eh. “Nga kwah ba kiei kiei ki jingïatreikam kin long kiba shai bad kiba tyllun ryntih na ka bynta ka jingmyntoi ki nongshong shnong ka Mawkynrew Constituency hi baroh kawei”, l ong u Bah Banteidor.
